Novacaixagalicia acelera o seu proceso de fusión informática
luns, 31 de xaneiro do 2011
Novacaixagalicia
presentou o pasado venres en Compostela o seu plan de traballo para 2011, máis
centrado (a xuízo dos responsables da entidade bancaria resultante da fusión de
Caixa Galicia e Caixanova) no medre do crédito a pequenas e medianas empresas e
familias. Na xeira de datos dados a coñecer perante uns 300 profesionais da
devandita banca (entre os que se salientou un beneficio de 144 millóns ao peche
de 2010), fíxose especial fincapé nos recursos que se están a mobilizar para
acelerar ao máximo o proceso de fusión, “con
especial atención á integración operativa”.
Isto significa que un dos obxectivos básicos da entidade é
que tódolos seus centros traballen e se apoien nunha plataforma única. A idea,
segundo fixeron saber os responsables tecnolóxicos da caixa galega, é concluír
a fusión informática este mesmo ano, “o
que permitirá unha máis rápida integración de tódolos procesos, a mellora da
eficacia e a xeración de sinerxías”. Asemade, traballarase para seguir
mantendo a Galicia como unha dos cinco grandes canles distribuidoras de España en “operatoria financeira, con centros tecnolóxicos propios na Coruña,
Ourense e Vigo”.
