Nova aposta da Universidade de Vigo no eido da robótica
luns, 14 de marzo do 2011
A Escola de Enxeñería Industrial da
Universidade de Vigo, na súa teima por perfeccionar dispositivos que melloren a
nosa calidade de vida e realicen os traballos máis pesados por nós (labor que
comezou hai dous anos co robot Rato),
vén de asinar un convenio de colaboración coa empresa Kuka Robots Ibérica, para
traballar cóbado con cóbado no eido da formación e a mobilidade.
Segundo
apuntan dende o DUVI, o diario online
da entidade académica, a sinatura deste convenio ten como obxectivo prioritario
formar tanto ao alumnado como ao profesorado
“en alta tecnoloxía e en innovación tecnolóxica”, e entre outras cousas,
permitirá a creación dunha Aula Kuka para
a formación específica dos alumnos e alumnas no eido da robótica.
Trátase dun laboratorio no que, segundo
indica o xornal online, “se instalará un robot industrial e varias
licenzas de software relacionado coa robótica que a empresa se compromete a
actualizar anualmente”.
Nesta Escola de Enxeñería Industrial,
berce doutros prototipos como o botóns BellBot, (do que
demos conta recentemente en Código Cero), xa estaban en funcionamento a
aula Siemens e a Schneider Electric, que agora sumarán esforzos coa aula Kuka
para consolidar a aposta da entidade pola automatización industrial e a
robótica con empresas “de primeira liña
internacional”.
- Salustiano Mato e Gustavo Moscardó durante a sinatura do acordo.
Asemade, a firma comprométese a ofrecer
formación de balde para o profesorado nas tecnoloxías e produtos
comercializados por Kuka así como cursos formativos para o alumnado que a
Universidade poderá programar anualmente ou cada vez que a empresa desenvolva
tecnoloxía nova.
A firma tamén se compromete a respaldar
aqueles proxectos fin de carreira que os alumnos e alumnas leven a cabo no eido
da robótica e a automatización industrial, e mesmo a realizar prácticas na
empresa tanto en España como en Alemaña.
Isto último, tamén é da idea do profesor
da Área de Enxeñaría de Siemens e Automática, José Ignacio Armesto, quen
destacou “o elevado interese do alumnado
en realizar estancias Erasmus en Alemaña”.
O responsable en España de Kuka, Gustavo
Moscardó, mostrou a súa satisfacción por ter asinado este acordo coa
Universidade de Vigo e subliñou a importancia de que os seus enxeñeiros coñezan
de primeira man todo o que se move no eido da automatización industrial e a
robótica.