Nace unha nova web 2.0 para apoiar a candidatura de Madrid 2016
mércores, 3 de xuño do 2009
Como complemento á páxina oficial de
apoio á candidatura de Madrid ás Olimpiadas
do 2016, un sitio que ofrece completa información sobre as vantaxes e
peculiaridades desta cidade para ser “villa
olímpica” dunha vez por todas, os responsables da iniciativa veñen de
lanzar tamén ao ciberespazo unha web 2.0, que nace como un lugar de reunión
virtual para todos aqueles que apoian o devandito proxecto dende onde queira
que estean.
Holamadrid2016.com,
que así se chama esta nova web, tén como principal obxectivo “xerar un maior movemento de apoio popular a
Madrid 2016”
así como facer de punto de encontro en liña de tódolos amantes do deporte en
xeral e dos Xogos Olímpicos en particular.
Entre outras cousas, esta ferramenta, que
é máis interactiva e moderna que a súa complementaria, permite deixar mensaxes
aos voluntarios e deportistas, enterarse da actualidade da candidatura,
participar en blogs ou formar parte na xeración 16, un programa para implicar
ás persoas máis novas na candidatura da capital española aos Xogos Olímpicos do
2016.
En resumidas contas, a función de
HolaMadrid2016 é xerar un maior movemento de apoio popular á candidatura
olímpica Madrid2016, e conforme ao obxectivo de organizar os “Xogos das persoas”, os responsables plantexaron
o reto de acadar o maior número posible de apoios á candidatura madrileña a
través deste sitio.
Para isto, HolaMadrid2016 ofrécelle aos
seus usuarios e usuarias un contador de apoios a través do cal poden sumarse a
este reto e engadir os seus votos á candidatura. Polo de agora, o proxecto
conta con preto de 45.000 apoios.
Nembargantes, estas dúas webs non son as
únicas que circulan pola Rede para apoiar a iniciativa e páxinas como
madriddosmil16, madridolimpico.net ou logo2m16.com, entre outras, son algunhas das
que hai por Internet e que comparten temática coas protagonistas desta nova.