Nace GC Tendencias, nova páxina web para informar da cultura galega da que non se informa

Entre os medios dixitais galegos que están a facer fronte común esta semana arredor dunha celebración que nos afecta a todas e todos, o Día da Patria Galega, sitúase Galicia Confidencial que celebra a festividade do 25 de xullo coa nova páxina webGC Tendencias, “un paso máis na construción dunha alternativa mediática en galego, de calidade e cen por cen independente”. O lema da nova proposta web fala por si só: GC Tendencias racha cos tópicos da cultura galega. A web, que xa está en marcha desde hoxe, véspera do Día do Patria, envorcará os seus esforzos en tomarlle o pulso, tentando non deixar nada sen rexistrar, aos eidos da creación e da actualidade cultural. A idea é dicir as cousas claras e fuxir lonxe do común da información sobre a nosa creatividade.
A nova páxina web, informa o equipo de Galicia Confidencial, terá máis capacidade de visión có común das webs sobre as ditas materias. Así, no seu seo terán acubillo expresións artísticas afianzadas como a literatura e a música pero tamén outras que nunca gozaron da atención dos grandes medios, como o cinema porno ou a fotografía erótica, por poñer uns exemplos. O web, engádese, incluirá tamén seccións máis habituais, como unha axenda cultural e un espazo propio para algunhas das exposicións máis importantes que se poden visitar nestes días. “Un dos obxectivos é lograr artellar un punto de referencia na web para os creadores máis novos de Galicia”, explican. O proxecto está coordinado por Paco Gallego, que dende hai meses informa en GC sobre os creadores máis novos e orixinais do país. Ademais de Gallego, en GC Tendencias colabora todo o equipo que de cote mantén actualizado o medio dixital GC. A proposta Tendencias xa ten presenza de seu nas redes sociais, “un paso máis no esforzo de GC por construír un medio en galego e independente de calquera mecenas empresarial, político ou sindical”.