Mundos Dixitais despídese mañá cunha completa xornada de relatorios e dúas entregas de premios

Ben Jones falou hoxe en Mundos Dixitais do seu traballo na supervisión do deseño de personaxes de Guardianes de la Galaxia

A xornada de clausura do Festival Internacional Mundos Dixitais 2015, que se desenvolve na sede de PALEXCO, acolle unha completa programación de relatorios de animación e efectos especiais e rematará coa esperada cerimonia de entrega dos premios 3DAwards e os premios do Festival Internacional de Animación.
A xornada contará con relatorios dos responsables das dúas series de televisión máis importantes da tempada de efectos visuais en produción nacional e internacional como son El Ministerio del Tiempo e Juego de Tronos.
O programa da mañá finaliza coa presentación da nova produción dos creadores de Tadeo Jones, Atrapa la bandera, que será unha das películas máis importantes do ano no xénero de animación e que estará nos cines a partires do 28 de agosto, e que serviu de imaxe para a presente edición do certame.
Pola tarde, e como broche ao Festival, celébrase a entrega de premios dos 3DAwards así como do Festival Internacional de Animación. Este último outorga, cada ano, catro premios nas categorías de: Mellor Curtametraxe de Animación, Mellor Curtametraxe Nacional, Premio Especial do Xurado e Premio Especial do Público. Sergio Pablos, supervisor de animación de películas como Tarzán, El jorobado de Notre Damme ou El Planeta del Tesoro será quen reciba o Premio Especial de Mundos Dixitais pola súa traxectoria profesional.