Multada unha empresa galega por usar software ilegal
martes, 2 de marzo do 2010
O Comité Español da Business Software Alliance (BSA), vén de
informar da decisión tomada polo Xulgado Mercantil número 2 da Coruña de
adoptar medidas cautelares contra a empresa galega A-CERO por presunto uso de
sofware non autorizado.
Esta empresa, con sede na Coruña, terá que depositar ata 254.874
euros en garantía de pago ante a posible indemnización que deberían recibir por
danos e perxuizos as empresas afectadas polo uso de software sen licenza se finalmente
a sentenza é favorable aos demandantes.
Trátase, segundo informan dende a BSA, “dun dos meirandes depósitos esixidos ata o momento en España a unha
sola empresa por presunta instalación e uso de software ilegal”.
O xulgado decretou ademais o embargo dos equipos nos que estaba
funcionando o software, así como o cese da actividade ilícita desta entidade
dedicada á arquitectura e ao urbanismo.
Os feitos datan de xuño de 2009, cando por orde xudicial se levou
a cabo un rexistro da actividade desta empresa. A inspección revelou o uso
presuntamente ilegal de sofware sen licenza de compañías como Microsoft, Adobe
e Autodesk e o informe pericial estimou que “o valor dos programas pirateados
era de 254.874 euros”, cantidade que agora debe depositar a compañía á espera
de que se celebre o xuizo e se dicte sentenza.