Mulleres Salgadas e a Deputación de Pontevedra formarán ás traballadoras do mar en competencias dixitais

A Asociación Mulleres Salgadas e a Deputación de Pontevedra formarán este verán ás traballadoras do mar en competencias dixitais. Farano ao abeiro dun proxecto formativo con dous cursos enfocados á integración das mulleres do sector nas novas tecnoloxías que, como destacou a presidenta provincial Carmela Silva, “son clave para acadar o reto da transformación dixital”, en o caso concreto deste sector, son un reforzo para conseguir o apoderamento das traballadoras.
A presidenta provincial compareceu xunto á presidenta de Mulleres Salgadas, Dolores Gómez, e outras representantes do colectivo, e quixo destacar o papel que está a xogar esta asociación, que agrupa a 1.600 galegas, para visibilizar ás mulleres do mar e conseguir que "teñan voz e voto á hora de tomar decisións no sector pesqueiro".
Como explicou a presidenta de Mulleres Salgadas, Dolores Gómez, serán dous os cursos que se celebrarán entre xuño e agosto. Un deles leva por título Alfabetización dixital +55, "e busca que estas mulleres non se sintan desprazadas por non ter estes coñecementos". Trátase dun curso básico orientado ás mulleres de estas idades que as axudará a familiarizarse con cuestións como a creación do correo electrónico, a videochamada, a navegación por Internet ou a banca electrónica.
O segundo curso é Participación cidadá a través de tecnoloxías dixitais, e será de iniciación, co obxectivo de mostrar ás participantes ferramentas prácticas na vida cotián relacionadas coas novas tecnoloxías, con conceptos como a acreditación dixital, xestións telemáticas básicas, notificacións ou sede electrónica entre outros.
Serán un total de dez sesións, cinco de cada un dos cursos, que se celebrarán nos concellos de Vilanova, Cambados, A Illa de Arousa, O Grove e Vilagarcía en horario de tarde e que teñen un máximo de dez prazas cada un. En xuño e xullo celebrarase o curso de Alfabetización dixital +55 (20 e 27 de xuño e 4 e 11 de xullo en Vilanova; 21 e 28 de xuño e 5 e 12 de xullo en Cambados; 29 de xuño e 6,13 e 20 de xullo na Illa; 23 e 30 de xuño e 7 e 14 de xullo no Grove e 24 de xuño e 1, 8 e 15 de xullo en Vilagarcía), mentres que o de Participación cidadá a través das tecnoloxías dixitais será en agosto (1,8,22 e 29 en Vilanova; 2,9,16 e 23 en Cambados; 3, 10, 17 e 24 na Illa; 4, 11, 18 e 25 no Grove e 5, 12, 19 e 26 en Vilagarcía). Para os primeiros as inscricións comezan mañá venres 10 de xuño, mentres que para os de agosto se abrirán o 22 de xuño e as interesadas poden facelas no enderezo electrónico info@mulleressalgadas.es.