Movistar e Ecomar traballarán para sensibilizar aos adolescentes na importancia de coidar o mar
xoves, 5 de outubro do 2023
Movistar
e a Fundación Ecomar xuntaron forzas para promover a mocidade o
coidado dos mares e do medio ambiente. Farano
a través do programa educativo ApS Ecomar: Navegando por Mares de
Conciencia e Saúde. A operadora encargouse de desenvolver
unha plataforma adaptada aos contidos educativos impartidos e será a
provedora das instalacións, as licenzas e o mantemento desta
ferramenta de aprendizaxe cun enfoque eminentemente dixital.
Segundo
explica a empresa de telecomunicacións, a plataforma de estudos
online utiliza a metodoloxía de Aprendizaxe e Servizo (ApS),
que permite aos estudantes aprender e contribuír á sociedade de
maneira simultánea. Para iso, integra a aprendizaxe de contidos,
habilidades, valores e o servizo á comunidade nun mesmo proxecto
educativo.
Os
principais obxectivos do proxecto son: fomentar a concienciación
sobre a saúde do corpo e do planeta, promover a participación en
accións sociais, desenvolver o liderado ambiental e ofrecer
experiencias de educación ambiental prácticas máis aló da aula.
Os
estudantes que participen non só adquirirán coñecementos sobre o
medio ambiente e a sustentabilidade, senón que tamén poderán
converterse en cidadáns activos e conscientes da súa contorna,
comprometidos coa preservación dos nosos mares e cun estilo de vida
con hábitos máis sustentábeis.
O
proxecto piloto de ApS Ecomar levouse a cabo no centro escolar
Lestonnac, en Barcelona, durante o ano 2022, cun “importante éxito
en materia de participación e resultados”, informou Movistar,
engadindo que nesta iniciativa, 90 estudantes de Educación
Secundaria participaron activamente, creando camiño para a difusión
e réplica do proxecto a novos centros escolares, públicos e
privados, así como outras institucións educativas.
O
programa está deseñado principalmente para estudantes de Educación
Secundaria Obrigatoria. No próximo mes, máis de 1.000 adolescentes
poderán comezar a utilizar esta ferramenta educativa.
ApS
Ecomar preséntase como unha actividade curricular integral que
forma parte do programa anual dos centros educativos. Cunha duración
aproximada de 20 horas de contidos, divídese en dous bloques un que
aborda temas clave como o proxecto en si mesmo, a importancia da
natureza e os nosos océanos, a pegada de carbono, a economía
circular, a sustentabilidade, a contaminación ambiental e o
autocoidado; e outro con carácter práctico, que inclúe a
participación dos estudantes na limpeza de costas e a estimulación
da creatividade do alumnado e fomento das competencias dixitais ao
redor de temas ambientais.