Moonbite e Desoños presentan un videoxogo sobre a historia de Vigo
martes, 1 de febreiro do 2011
As empresas viguesas Moonbite Games e Desoños veñen de inaugurar un innovador capítulo
dentro do estudo e recuperación da historia e a cultura da súa cidade. Dáse a
casualidade de que este capítulo é froito do tempo que vivimos, o tempo
dixital, e da propia actividade de ámbalas dúas empresas, centradas na achega
de lecer electrónico, deseño gráfico-web e fornecemento multimedia. Viaxe
ás Covas do Folón, o resultado do seu traballo de lecer-histórico, é un
videoxogo especialmente dirixido á comunidade estudantil, co fin de que boten
unha ollada ao pasado da cidade por medio dun recurso que xa quixeramos moitos
para nós e que agora, grazas á Rede, se pon ao alcance da rapazada: unha máquina
do tempo.
- Carlos Fernández (de pé) e Carlos Álvarez, creadores de Viaxe ás Covas do Folón</Em> nunha fotografía publicada polo Faro de Vigo
Segundo reflicte estes días o Faro
de Vigo, a achega inclúe retos didácticos e preguntas, diferentes etapas
históricas para percorrer e menú variado de personaxes (dous en activo aos que
se engadirán catro en breve). O xogo, que contou para o seu desenvolvemento co
apoio da Concellería de Xuventude e Normalización Lingüística, é unha firme
tentativa de quitarlle ferro á cultura pola vía das feituras e os fondos que máis
demandan os nenos e os adolescentes: os da sociedade dixital. En certa maneira,
explican os seus responsables, cumpre a mesma función que moitos volumes de
historia local, pero co gancho do divertimento en liña. O xogo está dividido en
nove épocas que se suceden de xeito cronolóxico: Megalítica, Bronce, Castreña, Romanización, Idade Media, Pacega,
Reconquista, Modernismo e Actualidade.
Para dar forma a cada etapa e para acadar a máxima coherencia e fiabilidade,
contouse coa colaboración do arqueólogo Javier Luaces.
Ao longo deste percorrido inclúense unha serie
de xogos e preguntas a resolver, incorporando unha cuestión final cuxa resolución
está na mesma cidade. Segundo explican os responsables da proposta, trátase de
facer que as nenas e os nenos descansen un pouco do xogo e complementen esta
actividade con saídas á súa contorna urbana. Viaxe ás Covas do Folón, que requiriu case un ano de traballo para
a súa materialización, non é un proxecto empresarial no sentido estrito dos
termos, senón un fornecemento aberto para contribuír á cultura local da
comunidade escolar viguesa. E dicimos aberto porque, de feito, o
desenvolvemento dos personaxes que están pendentes de crear correrá a cargo dos
propios rapaces, que poderán implicarse directamente no xogo e ver logo como se
converten as súas propostas en figuras
reais en 3D.
