Monument Tracker amosa estes días en Ourense as súas aplicacións turísticas para a Ribeira Sacra e Guimarães

Os Canóns do Sil, unha das xoias paisaxísticas da Ribeira Sacra

Monument Tracker é unha empresa francesa de gran experiencia en materia de recursos turístico-culturais para teléfonos intelixentes. Estes días o seu labor tócanos especialmente de preto por dous motivos principais: porque estará na xuntanza Territorios Creativos de Ourense (o presidente da firma, Jean-Jacques Lottermoser, dará a coñecer o seu traballo recente o xoves 27 ás 12.00 horas) e porque a súa actividade máis inmediata baseouse no desenvolvemento de guías para smartphones e tablets sobre Guimarães, a Ribeira Sacra e as súas múltiples riquezas turísticas e paisaxísticas. Precisamente, a súa presenza estes días en Ourense ten que ver, directamente, coa presentación destes desenvolvementos. Para que nos complemente a información que vai achegar na cita internacional atlántica que se celebra no Centro Cultural Marcos Valcárcel, puidemos falar con Lottermoser.
-En que vai consistir a aplicación (app) para teléfonos intelixentes que a empresa Monument Tracker está a desenvolver para a Ribeira Sacra (Galicia) e para a cidade portuguesa de Guimarães?
-Os desenvolvementos para Ourense e Guimarães son aplicacións móbiles sobre para smartphones e tablets con sistemas iOS e Android (Google Play) traducidas ao galego, o portugués, o inglés e o español. O principio das aplicacións é o de enriquecer a experiencia turística dos viaxeiros para afondar no coñecemento dos monumentos das cidades que están a visitar.
-Como funcionan?
-Pois en primeiro lugar facilitan o descubrimento dunha cidade e do seu patrimonio a través dun enfoque simple, lúdico e orixinal. Responden de xeito inmediato e automático a tódalas esixencias dos usuarios, afeccionados ao estudo e coñecemento do patrimonio histórico, novos ou maiores. Achégannos á historia dunha maneira divertida e apaixonante, amais de permitir que nos mergullemos nun mundo virtual para mellorar, precisamente, a captura da realidade. Por outra banda, propoñen un contido serio e completo pero sen tomarse en serio a si mesmas. Quen pasou algunha vez por diante dun monumento sen ter posibilidade algunha de coñecer a súa historia, poderá entender os baleiros que queremos encher. A cultura é a relación social entre os habitantes dunha cidade, o xeito de entender a cidade e participar na historia. Os desenvolvementos que imos presentar, polo tanto, constitúen un método para permitirnos viaxar no tempo, dar conta das marabillas do pasado ao tempo que nos divertimos.
-Que funcións específicas subministran? Hai só un punto de vista para coñecer unha cidade ou un espazo monumental e paisaxístico concreto ou temos máis posibilidades ao noso dispor?
-Si, a mesma aplicación propón varios enfoques para descubrir unha cidade. Cada visitante ou turista chega a un lugar á súa maneira e atopa cousas á súa maneira, tanto o visitante clásico como o aventureiro. Por exemplo, fornecemos para os máis novos o servizo de caza do tesouro, que se dirixe a estimular e divertir aos máis pequenos, transformándoos en historiadores e sen que eles mesmos se decaten. Tamén hai alertas automáticas para os seareiros da marcha libre, sen restricións nin atrancos, pero que ao mesmo tempo están interesados no que lles vai saíndo ao paso, e son avisos que os poñen ao tanto da proximidade dun monumento. Incluímos tamén nas aplicacións funcións de realidade aumentada (que nos posibilita esculcar no espazo da nosa contorna e ver os monumentos desaparecidos), enquisas para calibrar os nosos coñecementos, circuítos temáticos para xuntar aos seareiros deste tipo de turismo, viaxes personalizadas, banda deseñada para sacar o aventureiro que todos levamos dentro, reconstrución de lugares de interese en estado de ruína ou desaparecidos, postais reconfortantes e nostálxicas para pór un pouco de poesía e sentimento no mundo, fichas de monumento, claves de investigación e, finalmente, unha aposta clara pola ergonomía e polo emprego doado das ferramentas que se inclúen, cunha navegación accesíbel para todas e todos.
-Para quen van dirixidas estas aplicacións, en cuestión de idades?
-Para tódalas idades, de 7 a 87 anos. Xa contamos con 600.000 usuarios. A aposta pola ergonomía e as diferentes funcións que complementan en enriquecen o produto encamíñanse a tocar tódalas categorías de idade e de niveis de cultura. A aplicación móbil de descubrimento de patrimonio a través dun enfoque lúdico e intuitivo é accesíbel para todo o mundo. Ademais, permiten a interactividade entre diferentes xeracións. Os tests teñen demostrado, entre outras cousas, que os nenos recorren de maneira sistemática á caza do tesouro, e que unha vez que son arrastrados a esta actividade, logo é a quenda dos seus pais para entrar en xogo, á procura deles, poñéndose mans á obra na resolución dos diferentes enigmas que se propoñen. Tamén temos visto que as parellas aceleran os seus circuítos de paseo libre para reparar logo na historia dos puntos fortes do itinerario. Os adolescentes, simplemente, adoran a tecnoloxía, e é precisamente esta a que os estimula para coñecer o seu contorno e ver neles mesmos futuros desenvolvedores de tecnoloxías. Os solteiros divírtense e atopan a súa alma de neno e a familia enteira apaixónase cos diferentes retos que se lle propoñen.
-Segundo comentades, os vosos recursos están en varias linguas...
-Si, as aplicacións están traducidas en varias linguas e conteñen ademais unha versión off line. Os turistas estranxeiros poden así descubrir a historia de cada monumento sen recorrer a Internet, polo que o custe é cero.
-As vosas aplicacións fican igual co paso dos anos ou actualízanse?
-Monument Tracker é unha start-up lanzada en 2010 por un ex director de Turismo e levouse o Premio Turismo 2013 Spring Digital. Preto de un millón de viaxeiros empregan as aplicacións editadas pola empresa. Os desenvolvementos son en efecto evolutivos, coas oficinas de turismo e servizos de patrimonio informando e facendo evolucionar o contido da oficina virtual en tempo real. Cada ano Monument Tracker presenta novas actualizacións nas 40 cidades que son sociais internacionais na actualidade.
-Que nos podedes dicir do proxecto europeo Imagina Atlántica, no que participades e no que se insire a xuntanza Territorios Creativos?
-A iniciativa Imagina Atlántica permitiu financiar unha solución creativa e innovadora común ás cidades do arco atlántico. Máis polo miúdo, posibilitou repensar o contido cultural e tratalo a través da animación en debuxo animado, facendo accesíbel e lúdico o contido cultural exhaustivo do destino. Guimarães e Ourense pagan só a adaptación gráfica e a integración dos contidos. A aplicación gráfica será gratuíta para o público e non contén publicidade algunha. Hai un gran potencial de beneficio para a cidade portuguesa e para a comarca da Ribeira Sacra, beneficio que tamén chegará claramente aos usuarios, e máis se temos en conta que detrás destes traballos atópase un proxecto colaborativo e internacional dirixido ao desenvolvemento turístico dixital.