Modernización dá os seus parabéns aos galardoados no certame de innovación galega de AGESTIC
luns, 17 de outubro do 2011
Entre os representantes da fronte común que
está a traballar na nosa polo afianzamento das novas tecnoloxías da información,
fronte integrada por entidades públicas e privadas do máis variado, contouse no
acto de entrega dos Premios INNOVA-G
de AGESTIC coa secretaria xeral de Modernización,
Mar Pereira, que quixo estar coa entidade galega que preside José María López
Bourio para recoñecer, dende o ámbito da Xunta, aquelas tecnoloxías, produtos e
servizos achegadas dende a nosa terra durante os últimos meses que máis
salientaran pola súa potencialidade de uso, de inclusión e de mercado. A xuízo
de Mar Pereira, o feito de que concorresen no certame 100 iniciativas da man de 46 empresas “pon de manifesto que as empresas galegas
avanzan sen perder de vista o crecemento imparable das novas tecnoloxías en
todos os ámbitos”.
Asemade indicou que “os
proxectos presentados reflicten o espírito emprendedor tanto do sector TIC
galego como das empresas non TIC que apostan por non perder as posibilidades
que as novas tecnoloxías poñen ao seu alcance”. Mar Pereira tamén
aproveitou para dar conta de diversas iniciativas da Administración para
fomentar a Sociedade da Información na nosa terra, como por exemplo a recente
aprobación do Decreto que regula a presenza da Administración en Internet e que
impulsa o avance cara o Open Data, poñendo á disposición de cidadáns e empresas
a información que xera a Administración. Esta medida, sinalou a secretaria
xeral, “constitúe un elemento xerador de
emprego e riqueza ao abrir a posibilidade de novas oportunidades de negocio
para emprendedores que poden crear novas aplicacións, servizos e produtos en
base a esta información”. Mar Pereira dixo tamén que o futuro diríxese na dirección de
modelos de negocio online que
evolucionan de xeito constante para satisfacer a personalización da demanda
actual.