Modernización destina 1 millón de euros para promover as TIC dende as entidades sen ánimo de lucro
mércores, 30 de xuño do 2010
Segundo
publica o Diario
Oficial de Galicia de hoxe, a Secretaría Xeral de Modernización e
Innovación Tecnolóxica vai destinar un millón de euros para subvencionar as
actividades de difusión relacionadas co desenvolvemento da sociedade da
información que leven a cabo as entidades sen
ánimo de lucro no noso país.
O departamento
que dirixe Mar Pereira subvencionará, por unha banda, eventos de promoción e
difusión da sociedade da información tales como xornadas, sesións de
demostración práctica do uso de Internet, conferencias ou congresos de
profesionais especializados, etc.; e pola outra, actuacións de difusión das TIC
dirixidas á cidadanía en xeral.
Asemade, e
en terceiro lugar, con parte desta contía preténdese axudar aos empresarios e
traballadores das pequenas e medianas empresas do país a manexarse coas novas
tecnoloxías e Internet con soltura.
A cuarta
liña está destinada, segundo informan dende Modernización, a subvencionar os
investimentos necesarios para a promoción da sociedade da información nas
entidades de interese social, sen ánimo de lucro, inscritas no Rexistro Único
de Entidades Prestadoras de Servizos Sociais, dependentes da Consellería de
Traballo e Benestar.
Estas
axudas están cofinanciadas polo Fondo Europeo de Desenvolvemento Rexional
(FEDER) e polo Plan Avanza.
A
resolución destas axudas considera obxecto de subvención a produción e
publicación de contidos xa existentes noutros formatos dixitais ou sen
dixitalizar anteriormente, así como a produción e publicación de novos contidos
e a creación de ferramentas e servizos que permitan a accesibilidade aos
contidos dixitais.
O prazo de
presentación de solicitudes será dun mes contado desde mañá e poden realizarse
no Rexistro Electrónico da Xunta de
Galicia ou en formato papel, preferentemente no Rexistro Único da Xunta en San
Caetano.
Segundo
recolle a convocatoria, “os proxectos que
se presenten para acceder a subvención teñen que buscar acadar un impacto
significativo que responda ás necesidades reais dun determinado sector de
usuarios ou actividade”.