Modernización aposta pola integración plena das TIC nos centros de ensino
xoves, 8 de outubro do 2009
A secretaria xeral de Modernización e
Innovación Tecnolóxica da Xunta de Galicia, Mar Pereira, no marco das II Xornadas Tecnolóxicas de Educación:
Xornada sobre a excelencia TIC que tiveron lugar en Santiago de Compostela,
salientou que “a integración das novas
tecnoloxías nos centros educativos non debe limitarse á dotación de
infraestruturas”, e defendeu que se estenda ao resto da comunidade
educativa, tanto aos docentes como ás familias.
Pereira cualificou de “imprescindible” a definición dunha
estratexia efectiva de integración pedagóxica das tecnoloxías nos procesos de
formación e aprendizaxe, e enumerou as principais premisas que esta
planificación debe respectar. Neste sentido, a secretaria xeral subliñou que é
necesario substituír o concepto de centro educativo polo de centro educativo
dixital, “como aquel que posúe os
recursos humanos e pedagóxicos, o nivel de conectividade, e as infraestruturas
de soporte suficientes como para permitir o uso dos dispositivos informáticos
na actividade docente e de aprendizaxe”.
Asemade, a secretaria de Modernización
destacou que os profesores deben posuír a capacitación pedagóxica suficiente
para a integración curricular das ferramentas tecnolóxicas e contar con
material de apoio para o seu uso, e sinalou que os libros de texto non teñen
por qué ser substituídos senón complementados por novos soportes. “Débese explorar e explotar todas as
posibilidades que a aplicación da tecnoloxía ofrece na mellora do proceso
cognitivo e de retención, así como na contribución á incentivación do alumnado”,
engadiu Mar Pereira.
No trascurso da súa intervención, a
secretaria tamén salientou que este debe ser “un proceso sostible”, que continúe no tempo e que complete a
formación dixital obrigatoria dos nosos alumnos e alumnas; uns alumnos,
engadiu, “que conforman a sociedade do
futuro na que serán os demandantes e consumidores de servizos dixitais”.
Mar Pereira quixo aproveitar a ocasión
para situar o sector educativo como un dos tres ámbitos de gran impacto social
(xunto coa xustiza e a sanidade) que deben ser os motores da integración das
TIC na sociedade; e rematou a súa intervención remarcando o impultos decidido á
modernización e á innovación tecnolóxica como “un dos eixes prioritarios de actuación do Goberno galego”.