Microsoft ofrecerá aos fabricantes licenzas de balde dunha nova edición de Windows 8.1

Confirmando os rumores dos últimos meses, Microsoft anuncia hoxe un novo programa para fabricantes no que facilitará o lanzamento de numerosos equipos con Windows cun prezo bastante reducido, xa que poderán aforrar o custo da licenza do sistema operativo grazas ao lanzamento dunha nova edición do mesmo chamada Windows 8.1 with Bing, que consistiría nunha versión de Windows que empregaría de xeito predeterminado o navegador Internet Explorer e o buscador Bing (aínda que tal configuración pode modificarse por parte do usuario). Nalgúns equipos (especialmente en tablets) o sistema operativo podería incluír unha subscrición dun ano ou servizo Office 365.
Lembremos que dende hai uns meses Windows é de balde para dispositivos con pantallas de menos de 9 polgadas, e que dende a súa última actualización Windows 8.1 só precisa para funcionar de xeito fluído 1 Gb de RAM e 16 Gb de almacenamento interno, polo que cada vez son máis os dispositivos que poden correr a última versión do sistema operativo de Microsoft, e con Windows 8.1 with Bing aínda ampliarían máis as posibilidades, dado que achegarían a familia de Windows e Office a moitos máis consumidores, o que resulta especialmente interesante para os desenvolvedores de aplicacións, que cada vez verán así máis atractivo apostar pola última versión de Windows.
É de esperar que nun par de semanas saibamos máis dos primeiros equipos que cheguen ao mercado con Windows 8.1 with Bing co gallo da celebración do Computex en Taipei.