Microsoft ingresou 20.890 millóns de dólares no último trimestre
venres, 20 de xaneiro do 2012
- Steve Ballmer nunha intervención durante o CES deste ano
Nun momento
no que compañías como Apple, Google, Facebook e Samsung parecen estar a dominar
o sector tecnolóxico pode sorprender a algúns que Microsoft continúe cunha
saúde excelente, e a
compañía de Redmond vén de anunciar uns resultados record para o segundo trimestre fiscal (que remata o 31 de
decembro), cuns ingresos de 20.890 millóns de dólares, o que supón un
incremento do 5% fronte o mesmo período de 2010.
Streve Ballmer, director xeral de Microsoft, asegura que estes bos resultados
veñen acompañados co pulo que están a dar aos seus servizos e produtos chave, o
que resultou evidente no CES de Las Vegas onde recibiron “análises moi positivos dos nosos teléfonos e ordenadores, e unha boa
resposta para o novo deseño Metro que unificará a experiencia de usuario entre
teléfonos, ordenadores, tablets e televisión en 2012”.
As cifras de Microsoft resultan abraiantes, e veñen a dar a coñecer que dende o
seu lanzamento o Windows 7 conseguiu vender máis de 525 millóns de licenzas,
mentres que o Office 2012 conseguiu achegarse aos 200 millóns de licenzas nos
seus 18 meses de vida, datos que dan a entender que os negocios principais da
compañía continúan a ser moi sólidos (pese á orientación á nube de moitos
servizos) e tamén no sector do lecer electrónico a compañía está a ter un éxito
sen precedentes, especialmente nos EE.UU., onde a principal consola de
videoxogos do último ano foi a Xbox 360, que actualmente ten unha base de 66
millóns de consolas, ás que habería que sumar a boa acollida do sensor Kinect
(do que venderon 18 millóns de unidades). Queda agora por ver se a compañía
consegue gañar un lugar de seu no mercado dos smartphones e dos tablets, actualmente dominado por Apple e Google.