Microsoft apoiará as novas iniciativas tecnolóxicas das universidades de RedEmprendia
mércores, 10 de xullo do 2013
- RedEmprendía colabora con distintas plataformas que contribúen ao emprendemento (na imaxe, Senén Barro asina un convenio de colaboración coa CSEV)
A rede universitaria
iberoamericana RedEmprendia
(da que forma parte a Universidade de Santiago, USC) e Microsoft
Ibérica anunciaron esta semana que van
colaborar no pulo á Investigación e o Desenvolvemento e máis na
creación de novas empresas dende os campus de sete países de
Iberoamérica. Máis polo miúdo, cooperarán impulsando accións
de apoio, facilitando ferramentas, acceso a bases de coñecemento e
formación técnica para os emprendedores nas 24 universidades
iberoamericanas que participan na Rede.
O acordo establece o
apoio ás spin-offs e startups de base tecnolóxica das
universidades a través do programa BizSpark de Microsoft (de acceso
totalmente gratuíto para os emprendedores de RedEmprendia) e a
colaboración entre as universidades para identificar os ámbitos de
investigación e innovación nos que se poidan fixar novos alicerces
para o traballo ombro con ombro en proxectos conxuntos. O ex reitor e
(actualmente) profesor da USC Senén Barro, presidente tamén de
RedEmprendia, salientou a aposta desta entidade por “converter a
Universidade en motor dun tecido empresarial iberoamericano baseado
na innovación e o coñecemento, para o que é de vital importancia
que as ideas que xerminan nas aulas e laboratorios conten con
recursos para medrar e converterse en proxectos reais
que redunden en beneficio de toda a sociedade”.