Meubook estrea nova feitura web destinada a facilitar os procesos de publicación
xoves, 15 de decembro do 2011
Meubook, a
plataforma galega para promover as nosas obras culturais a través das novas
canles, ten operativa dende hai uns días a súa nova páxina web: Meubook, A
factoría dos teus libros. Con esta nova achega, infórmanos a empresa
compostelá Tórculo, co-responsábel da posta en marcha e desenvolvemento da
iniciativa, ponse en xogo unha simplificación dos procesos editoriais, de xeito
que co menor número de pasos e no menor tempo posíbel, poidamos facer
realidade, os internautas, a nosa arela de publicar. A web renóvase baixo o
seguinte lema: Porque os soños fanse
realidade, somos a factoría dos teus libros.
A idea sobre a que
apoia esta estratexia é a de situar ao usuario como eixe central da proposta, “ela ou el será quen publique, quen venda,
quen comente, quen opine, quen merca, e todo nun espazo persoal e dinámico”,
informan. Meubook baséase no concepto da web 2.0 e estes cambios dos que vén de
ser obxecto diríxense máis que nunca a ese concepto, achegándose unha completa
renovación visual e estética e tamén de funcións, procesos e navegación, todo
máis participativo e próximo. En palabras dos responsábeis de Meubook, trátase
de permitir que calquera usuario se converta en xerador potencial de contidos.
Neste e noutros sensos, a plataforma ofrécelles aos internautas asesoramento e
información constantes e, unha vez publicado o contido, axúdalles a divulgalo e
promovelo a través da Internet e as redes sociais.
Outro dos aspectos
clave que distinguen a Meubook é a calidade, subliñan os seus promotores. Neste
senso, comentan, cómpre esquecer a idea de que a “autopublicación teña que estar rifada coa calidade; con este obxectivo
supervisamos os procesos de produción, dende o que nos leva o pedido até que se
fai o envío e empréganse os mellores materiais”. Amais de todo isto, nesta
nova andaina de Meubook poderemos atopar espazos diferenciados e personalizados
para cada tipo de publicación e institución, dende autores até editoriais ou
universidades. A presenza un mesmo espazo dun amplo conxunto de proxectos,
institucións e empresas multiplica a visibilidade de cada unha delas,
fomentando a interacción e relacións entre os usuarios, sinalan os responsábeis
de Meubook.