Medra a demanda dos europeos polo acceso á Rede
mércores, 14 de agosto do 2013
A
Comisión Europea publicou onte os resultados
dun Eurobarómetro especial no que recollen unha enquisa sobre comunicacións
electrónicas no ámbito doméstico nos que vese o crecente interese dos
europeos polas TIC, que atopan como
principal atranco para a súa expansión o prezo, de aí que a vicepresidenta
da Comisión, responsable da Axenda Dixital, Neelie Kroes, asegurase que “conseguir
que as expectativas dos consumidores poidan satisfacerse a un prezo asumible é
un dos obxectivos do paquetes de medidas chamado Un continente conectado, que será presentado pola Comisión o
vindeiro mes de setembro”.
O interese dos consumidores pola tecnoloxía é cada vez maior, demandando
velocidades de banda larga cada vez superiores para poder acceder aos novos
servizos que están a lanzarse e para poder manter conectados os moitos
dispositivos que temos no fogar que poden acceder á Rede, pero un dos ámbitos
nos que máis está a notarse o crecente interese polas TIC é a Internet móbil,
que no caso español pasou dunha penetración do 32% en decembro de 2011 a un 57%
a primeiros de 2013, superando a media europea (49%). Outros países cun
crecemento interanual semellante ao de España foron Italia e Francia (aínda que
no caso italiano non conseguen superar a media comunitaria).
Aínda que podemos dicir que practicamente a metade dos europeos acceden á Rede
dende o móbil, a implantación desta tecnoloxía é moi dispar, cun 71% dos
usuarios móbiles en Suecia, un 68% en Dinamarca e un 65% en Reino Unido (como
casos que superan o noso) e cuns casos lamentables como os de Bulgaria (20%),
Romanía (25%) e Portugal (26%).