Medio Rural anímanos a xuntar forzas na gran comunidade galega de internautas contra o lume
martes, 1 de agosto do 2017
Até
o de agora, as galegas e os galegos sabíamos que podíamos ser
moitas cousas na vida. Do que se cadra non tiñamos constancia é de
que tamén podíamos ser devasas. Ou sexa, cortalumes para frear a
destrución forestal. É posíbel selo? Segundo a Consellería de
Medio Rural a resposta é si, categoricamente, e con todo o que isto
implica: que cada un de nós sexa o elo dunha cadea de colaboración
cidadá para loitar contra a lacra dos incendios. Disto, de crear
unha comunidade virtual de activistas medioambientais que teña ampla
repercusión no propio medio ambiente galego (do virtual cara ao
real), é do que trata a campaña Faite
Cortalumes
de Medio Rural. Xa ten páxina web propia, soncortalumes.gal,
onde podemos darnos de alta e engadirnos ao colectivo.
Para
xuntar forzas coa comunidade xa formada só teremos que enviar un
vídeo ou unha foto cos nosos datos persoais (cubrindo un formulario
específico) á conta soncortalumes@xunta.gal.
Segundo informa Medio Rural, “todos podemos ser cortalumes, un
oficio que simboliza compromiso cos nosos montes, orgullo, sentido do
deber, valor e responsabilidade”.
Trátase, en definitiva,
dunha campaña de divulgación e concienciación cidadá fronte aos
incendios forestais que xira arredor da páxina soncortalumes.gal
e ten por obxectivo chegar a cada recanto de Galicia e conseguir que
todas e todos formemos unha gran devasa humana, de “carácter
simbólico” pero que sirva de complemento eficaz ás 10.500
hectáreas de devasas físicas e reais que existen nas nosas
forestas.
A
iniciativa foi presentada o 14 de xullo e xa conta co apoio e
adhesión de múltiples facianas coñecidas da nosa cultura e de
múltiples sectores institucionais e empresariais.