Mariel Martínez e Helena Fernández amosan hoxe en IqualTec a súa experiencia como mulleres nas TIC
xoves, 2 de xullo do 2015
Hoxe, entre as 19.00 e as
20.30 horas, o espazo
CoWorking Vigo vai dar acollida a un encontro IqualTec, unha
iniciativa dentro do proxecto Tech&Ladies, orixinado dentro do
GDG (Google Developing Group) cuxo obxectivo é dar visibilidade ás
mulleres que traballan no eido das tecnoloxía. A xuntanza de hoxe
insírese nunha das principais liñas de actividade divulgativa de
CoWorking Vigo, que é a de convidar a mulleres profesionais do
sector tecnolóxico e científico para explicar como chegaron onde
está e debater sobre os retos aos que se enfrontan. Contarase
coa presenza de Helena Fernández, directora técnica da Área de
Investigación en eSaúde de Gradiant.
Tamén participará
Mariel Martínez, enxeñeira informática pola Universidade Oberta,
amais de co-fundadora de indenext.com e de ameiga.com, e integrante
do Grupo de Desenvolvedores Google en Vigo (GDG Vigo). Mariel
afondará na súa charla no proxecto Tech&Ladies, un proxecto que
como dixemos propón dar visibilidade ás mulleres que traballan en
tecnoloxía rompendo coa paradigma actual.
Pola súa banda, Helena
Fernández explicará a contribución de Gradiant ao desenvolvemento
de tecnoloxías TIC aplicadas á eSaúde dentro da área que dirixe.
Na charla, Helena Fernández revisará o concepto e os obxectivos
deste ámbito de traballo (novas tecnoloxías para mellorar e
optimizar a atención médica); presentará tecnoloxías e proxectos
desenvolvidos en Gradiant, e por último, comentará algunhas das
liñas de traballo futuras en Gradiant, e os retos asociados a elas.
Fernández é directora
técnica da Área de eSaúde no devandito centro tecnolóxico vigués.
É enxeñeira eléctrica pola Universidade Estadual de Rio de
Janeiro, máster pola Universidade Federal de Río de Janeiro (COPPE
/ UFRJ) e o doutorada na Universidade de Minho no marco do programa
de colaboración internacional MIT-Portugal. Desenvolveu parte do seu
traballo de doutoramento na División de Sistemas de Enxeñaría do
Instituto de Tecnoloxía de Massachusetts e na empresa portuguesa
Critical Health.