Mapean con drons e IA o crecemento da cría do mexillón cun 95% de efectividade
mércores, 18 de outubro do 2023
Vilanova
de Arousa acolleu este mércores 18 de outubro a
presentación dunha nova ferramenta tecnolóxica para obter
información permanentemente actualizada sobre o crecemento e
evolución da presenza da semente de mexillón no litoral galego.
Trátase dunha aplicación que amosará datos obtidos mediante
sensores de alta resolución embarcados en vehículos non tripulados
e intelixencia artificial que permitirá determinar a cantidade de
mexilla (cría do mexillón) e optimizar a súa recollida.
A
directora da Axencia Galega de Innovación (GAIN), Patricia Argerey,
participou nesta xornada de demostración que tivo lugar no Centro de
Investigacións Mariñas (CIMA) de Vilanova de Arousa, na que se
avanzaron os resultados deste proxecto. Asistiron tamén
representantes do Instituto Tecnolóxico do Mar (INTECMAR), do Centro
Tecnolóxico do Mar (CETMAR), do Instituto de Investigacións Mariñas
(IIM-CSIC) e da Consellería do Mar, así como do sector mexilloeiro.
A
solución desenvolvida, explicaron, “proporciona un conxunto de
ferramentas que cobren as fases de captura, catalogación, análise e
explotación de datos relativos á evolución da semente de
mexillón”. A través de vehículos non tripulados e Intelixencia
Artificial captúranse e analízanse os datos, identificando a
presenza de mexilla e, potencialmente, de percebe, así como doutras
especies presentes no ecosistema, mediante un proceso de segmentación
e zonificación da información recollida.
Esta
tecnoloxía permite deseñar e planificar as operacións de captura
de datos sobre o terreo mediante vehículos aéreos non tripulados
(UAV), almacenar e clasificar a información obtida nunha base de
datos xeoespacial, presentar a información recollida asociada ás
características morfolóxicas do terreo, á orientación e pendente
do litoral; dispoñer de información sobre as zonas onde se dá unha
presenza sensible e predominante de mexilla, coñecer a evolución do
recrutamento de semente de mexillón nun intervalo de tempo
determinado; e facilitar a consulta e análise de información
mediante ferramentas avanzadas de explotación de datos.
O
proxecto, adxudicado por un importe de 500.000 euros, está a ser
desenvolvido pola compañía Telespazio Ibérica, nun consorcio no
que tamén participan as empresas galegas Aeromedia e Bahía
Software, o centro tecnolóxico Gradiant e o Instituto de
Investigacións Mariñas IIM-CSIC, con sede en Vigo. O Centro de
Investigacións Mariñas (CIMA) e o Centro Tecnolóxico do Mar foron
as entidades que identificaron este reto ao que dar resposta con
tecnoloxías de sistemas non tripulados e tamén as futuras entidades
usuarias da solución desenvolvida.
É
un dos cinco proxectos adxudicados pola Axencia Galega de Innovación
este ano, con financiamento de Fondos Feder REACT-EU como parte da
resposta da Unión Europea á pandemia por COVID-19, para impulsar a
compra de solucións innovadoras próximas ao mercado que poidan
incorporarse a curto prazo á carteira de servizos públicos.