Manuel Varela Rey toma posesión como novo director da Axencia Galega de Innovación
luns, 14 de xaneiro do 2013
O conselleiro de Economía e Industria, Francisco Conde,
presidiu hoxe a toma
de posesión de Manuel Antonio Varela Rey como novo director da Axencia Galega
de Innovación (GAIN). No acto Conde sinalou a innovación como unha das
claves da recuperación económica, e destacou como principal meta do novo
mandato “mellorar a competitividade do
tecido empresarial e industrial galego por medio da posta en marcha de
estratexias innovadoras”.
Para iso, entre as tarefas que terá que levar a cabo Varela Rey, a quen
corresponde agora a posta en valor da GAIN, están o desenvolvemento da
Estratexia Estatal de Innovación para Galicia, e2i, que suporá unha achega de
35 millóns de euros; ou a activación da segunda convocatoria do programa
Innterconecta, cun orzamento de 75 millóns e que permitirá acadar ao cen por
cen o aproveitamento do Fondo Tecnolóxico.
Manuel Varela Rey é enxeñeiro industrial mecánico, e ademais da súa experiencia
na Administración pública, conta cunha ampla traxectoria na empresa privada,
onde desempeñou tamén postos relacionados coa I+D+i.