Mancomún organiza para a vindeira fin de semana un evento sobre a tradución de software libre
xoves, 8 de maio do 2008
O Centro
de Referencia e Servizos de Software Libre de Galicia organiza os
días 10 e 11 de maio en Santiago de Compostela o evento G11n:
eu traduzo o teu software, xornadas que reunirán as membros máis
activos da comunidade tradutora de software libre ao galego co fin de analizar
as estratexias e as ferramentas empregadas.
O encontro coincide coa celebración do 2º Aniversario de Mancomún e dividirase
en dúas xornadas: unha aberta ao público e outra orientada ao traballo interno
da comunidade.
A xornada de portas abertas do primeiro día do evento iniciarase cun relatorio
sobre terminoloxía impartido por Xusto A. Rodríguez Río, responsable da Área de
Terminoloxía do Servizo de Normalización Lingüística da Universidade de
Santiago de Compostela, ao que seguirá unha presentación por parte de
Helena Veiguela, directora xeral de Promoción Industrial e da Sociedade da
Información.
Veiguela tamén moderará unha mesa redonda na que se exporán distintas
perspectivas no eido da localización galega de software, rematando o día con
dous relatorios (por parte de Albert Astals Cid, coordinador de KDE 4.0, e Juan
Rafael Fernández, experto en tradución de software).