Mancomun.org, satisfeita pola predisposición das empresas galegas a integrar software libre

No camiño de preparar e facilitar o camiño das empresas do eido tecnolóxico no sofware libre (un sector de especial importancia para Galiza, por ofrecer un modelo de doada adaptación á situación económica, empresarial e xeográfica), Mancomun lanzou o mes pasado un programa formativo no que participaron até seis empresas TIC do país. A experiencia piloto, que vén de chegar á súa fin (relativamente falando, posto que por tratarse dun proxecto piloto non fixo máis que preparar o comezo), dixiriuse sobre todo á capacitación de empresas do eido tecnolóxico para coñecer, en última instancia, as súas posibilidades e limitacións cara a implantación e ao soporte de servizos en código aberto.
Na iniciativa, que se concebiu como un complemento ao DVD de ferramentas PEME lanzado en 2007 (e que en breve servirá para achegar informes e recursos engadidos), participaron as firmas RG Enxeñería, Eomática, Cibernia Informática, AVA, MYC e Inforede, así como un equipo de profesionais procedentes do Consorcio de Bibliotecas Universitarias de Galicia e do Consorcio Galego de Servizos de Igualdade e Benestar.
O curso desenvolveuse en Santiago do 13 de xullo ao 19 de xullo e, segundo informa Mancomun.org, todos os convocados coincidiron en salientar a súa utilidade. A maiores, serviulle á plataforma organizadora para actopar unha boa predisposición entre as empresas para integrar o sofware libre nos seus modelos de negocio
Contidos do curso
Os contidos do curso estruturáronse en dous módulos subdivididos en bloques temáticos. O primeiro dos módulos orientouse á implantación e soporte en software libre co gallo de dar a coñecer os seus modelos de negocio. A implantación e soporte de servizos básicos en código aberto foi a temática do segundo dos módulos, dirixido sobre todo ao persoal técnico das empresas.