Mancomún métese nas redes sociais
luns, 7 de febreiro do 2011
O portal Mancomún,
pertencente ao centro galego de promoción do software libre do mesmo nome,
semella estar collendo novos folgos. E faino logo de moitos meses de inquietude
sobre o futuro do centro, amosada en repetidas ocasións pola comunidade de
usuarios e deseñadores de programación aberta, e mesmo por plataformas en liña
como a
CiberIrmandade da Fala. Esta nova etapa de Mancomún, se ben non resolve tódalas
incógnitas ao respecto, abre certos vieiros para pensar nun novo pulo. E máis
se temos en conta que se reactiva como fonte de novas sobre código aberto e que
comezou o mes achegando
novos servizos, como o espazo wiki de Mancomún, o laboratorio e a sección
propia do usuario (o meu portal). Pois ben, hai máis. Tal e como nos
contan dende o centro, este vén de abrir novos veiros de comunicación nas redes
sociais.
Máis polo miúdo, nas contornas dos servizos Facebook, Twitter, NetVibes, Issuu e máis Flickr. Esta incursión
nas redes participativas forma parte dunha integración da web de Mancomún no
UniversoImit, “é dicir nas canles 2.0
dependentes da Secretaría Xeral de Modernización e Innovación Tecnolóxica”,
informa o centro de software libre.
A incorporación do portal no dito UniversoImit
permitirá “aumentar e mellorar a presenza
na Rede das iniciativas relacionadas co software libre e de fontes abertas, uníndose
nas mesmas canles sociais a información do Observatorio OSIMGA ou da rede CeMIT,
que é o tecido de aulas dixitais que cingue a Rede de Telecentros e a Rede de
Centros de Dinamización nunha única iniciativa”, infórmase dende o centro
galego.