Máis dun terzo dos españois cre que os bancos tradicionais aínda son máis seguros cós bancos en liña
martes, 30 de xuño do 2015
Os medios bancarios en
liña seducen e non seducen a partes semellantes. E, en moitos casos,
este caso de “engaiolamento” e “non engaiolamento” dáse nos
mesmos usuarios. Todo isto vén a conto porque un estudo recente de
Kaspersky Lab e B2B Internacional sinala que
arredor do 36% dos usuarios españois de Internet pensa que os bancos
tradicionais resultan aínda máis seguros cós bancos en liña.
Isto, porén, non lles impide facer pagos en liña (a maioría fano).
Con todo, coinciden en que os recursos dixitais fallan á hora de
tomar medidas básicas de seguridade. No estudo, de feito, tamén se
fai saber que un 55% dos usuarios vense vulnerábeis cando fan
transaccións a través das novas tecnoloxías.
Así, o 46% cre que facer
operacións offline é máis seguro que pagar online. Como
dixemos, esta desconfianza non impide que se dea un dato que non
deixa de ser contraditorio: que o 85% dos españois enquisados
usen os seus computadores ou portátiles para realizar pagos en
liña.
A maiores do devandito e
facendo referencia aos medios empregados, a investigación sinala que
o 85% dos enquisados usan os seus computadores ou portátiles para
realizar este tipo de pagos polo medio dixital, que o 56% usa as súas
tabletas e que o 46% os seus dispositivos intelixentes. Por outra
banda, só o 9% dos que dispoñen dunha TV intelixente utilízana
para transaccións.
Para os responsábeis da
investigación, un dos puntos máis salientábeis da mesma é a alta
porcentaxe de persoas que ven eivas importantes de protección de
datos nos servizos financeiros dixitais que teñen ao seu alcance.
Segundo apuntan dende Lab Iberia, “hoxe en día é de vital
importancia que os bancos invistan en tecnoloxía para garantir unha
contorna bancaria segura para os seus clientes; este enfoque non só
daría acougo aos que prefiren as sucursais bancarias ás dixitais e
convencelos de que a banca móbil é segura, senón que tamén
reducirá o risco para os clientes descoidados, que doutro xeito
poderían perder datos financeiros importantes".