Máis do 36% dos trámites administrativos da Xunta poden facerse a través da súa Sede Electrónica

A directora xeral de Avaliación e Reforma Administrativa, Natalia Prieto, destacou esta mañá o importante avance na incorporación de procedementos á Sede Electrónica, que a 31 de agosto permitía a cidadáns e empresas realizar 572 trámites en liña a través da súa páxina web, o que supera o 36% dos trámites totais perante a Administración autonómica.
En resposta a unha pregunta parlamentaria, Prieto tamén destacou que nos primeiros oito meses de 2013 houbo preto de 200.000 visitas á Sede, case o dobre das visitas que recibiu en todo o ano pasado. Nese mesmo período, presentáronse 7.836 procedementos, máis do dobre que en todo 2012.
Os procedementos que tiveron máis presentacións electrónicas na Sede durante os primeiros oito meses do ano foron as inscricións no rexistro de certificados de eficiencia enerxética de edificios, as subvención para entidades locais que contraten traballadores desempregados para a realización de obras e servizos de interese xeral e social; e as prazas xuvenís do programa campaña de verán.
Outro dato salientable é que o 45% do total de trámites electrónicos foron realizados por empresas, fronte ao 39% que corresponden a cidadáns e o 16% restante corresponden a outras administracións, fundamentalmente concellos, ou entidades.
A directora xeral destacou ademais as importantes vantaxes que esta nova ferramenta achega aos cidadáns que a empreguen. Así, destacou a rapidez e inmediatez na realización dos trámites, a eliminación do papel, a facilidade de acceso, a redución de cargas administrativas, e a seguridade e fiabilidade, xa que os trámites realizados a través da Sede teñen a mesma validez que os presentados no rexistro xeral da Xunta.