Máis de 300 persoas participan en Santiago no congreso iberoamericano de educación na era dixital
mércores, 4 de xuño do 2014
Finalmente celebrouse na
Cidade da Cultura o Primeiro
Foro Iberoamericano de Educación e Cultura na Era Dixital,
FIECED, unha
cita que avanzamos os días pasados en Código Cero e que
conseguiu reunir en Santiago a máis de 300 participantes. O congreso
desenvolveuse os días 3 e 4 de xuño, sendo un dos seus obxectivos
debater e intercambiar coñecemento (coñecemento transatlántico)
sobre o futuro da dixitalización das aulas. O desenvolvemento das
novas tecnoloxías e as súas implicacións no ensino foi o alicerce
dos relatorios de Alejandro Piscitelli, profesor titular do proxecto
#humanidadesdigitales, Tomás Poveda, director da Casa de América e
Miguel Ángel Prats i Fernández, mestre e psicopedagogo.
Tamén participou no
encontro o conselleiro de Educación e Cultura Xesús Vázquez, que
fixo un repaso das oportunidades para a docencia galega que fornecen
os recursos dixitais.
Os asistentes ao foro
puideron coñecer na primeira xornada de actividades os produtos e
solucións presentados polas diferentes empresas expositoras, como
por exemplo mesas interactivas, encerados-monitores dixitais
interactuando na contorna Windows, a Mochila Dixital Segura OnBook,
así como outras solucións educativas ao redor dos novos soportes
para o aula. Igualmente, informa a organización do congreso,
presentáronse os últimos modelos de proxectores interactivos e
sistemas de videoconferencia pensados para o mercado educativo.
Segundo engaden os
impulsores do foro, os alumnos galegos gozaron ademais dunha
exhibición de robótica, de demostracións sobre o funcionamento das
impresoras en 3D e doutras novidades tecnolóxicas pensadas para
nenos e adolescentes, para os ámbitos familiares e por suposto tamén
para as aulas.
Amais do devandito, na
mañá da primeira xornada do foro (a do día 3) amosáronse casos de
éxito de TIC no ensino como o exposto polo director do Centro
Rexional de Formación ao Profesorado de Castela-A Mancha, Jesús
Fernández Cid, un proxecto de transformación dixital na formación
do profesorado. Xa pola tarde, Celia Sánchez-Ramos, científica e
investigadora da área de Ciencias da Visión falou no seu relatorio
da relación entre a universidade e a empresa privada.
- Os galardoados nos Premios FIECED
O principal obxectivo de
FIECED, foro organizado pola firma tecnolóxica Crambo, foi xuntar
vontades, esforzos e visións dos diferentes pobos de Iberoamérica
para conseguir afrontar en inmellorábeis condicións o reto da
educación na era dixital. E de retos falou tamén Peter Hill,
experto consultor en áreas curriculares e de certificación, cuxo
relatorio desenvolveuse este mércores centrándose no papel das
novas tecnoloxías aplicadas á cualificación na era dixital.
Por outra banda, en
FIECED quíxose recoñecer aos profesionais, organizacións e
entidades que favorecen o desenvolvemento da educación: Casa
América, a Universidade Complutense de Madrid, a revista Educación
3.0, a violinista Ara Malikian e máis ao especialista en docencia e
tecnoloxías Peter Hill.