Máis da metade das empresas galegas apostan por R como operador principal de Internet e telefonía fixa

As cousas semellan estarlle indo ben ó noso operador de comunicacións por fibra óptica máis recoñecido por excelencia, R.
E é que, segundo o último estudo realizado por TNS Media & Tecnology sobre o mercado das telecomunicacións no ámbito empresarial galego, o 51,8 por cento das empresas da nosa comunidade que contrataron un acceso a Internet, apostaron polo devandito operador como primeira opción de servizo, tanto de Rede como de telefonía fixa.
Deste xeito, a compañía galega supera a suma da cota de tódolos seus competidores xuntos neste sector e convérsese tamén no primeiro provedor do servizo de correo electrónico das empresas, cunha cota de mercado do 32,4 por cento.
Por outra banda, onde hai cobertura de R, a penetración de acceso a Internet das empresas é do 71,5 por cento, máis de 7 puntos por enriba da rexistrada nas zonas onde o operador non está presente (64 por cento) e de entre elas, o 68 por cento contratan Internet de alta velocidade, o que fai deducir que a existencia de máis dunha rede de telecomunicacións é a mellor maneira de dinamizar e de potenciar o emprego das TIC en tódolos sectores sociais.
No ámbito da telefonía fixa ocorre algo semellante pois nas áreas onde as empresas poden escoller de entre varios operadores, o 50,5 por cento optaron igualmente por R, co que de novo, R se convértese na compañía que máis clientes suma no mercado empresarial de telefonía fixa (máis que tódolos operadores restantes xuntos).
Coa implantación do servizo de telefonía móbil, que segundo os responsables de R, “será unha realidade a finais deste ano”, o operador galego ampliará a súa actual oferta de servizos dirixidos ás empresas e profesionais mediante o lanzamento de tarifas combinadas de datos en banda ancha e 3G, potenciación de aplicacións como o correo electrónico ou diversas ferramentas de produtividade persoal.