Máis apoios para as xornadas JAI, que comezan o día 12 de novembro en Vigo
mércores, 31 de outubro do 2012
- O profesor da Universidade de Vigo Ignacio Armesto, principal impulsor das JAI
As Xornadas
de Automatización Industrial da Universidade de Vigo, impulsadas
polo profesor Ignacio Armesto, xa
teñen arestora máis de 470 asistentes particulares inscritos, 230
profesionais rexistrados e unha manchea de empresas colaboradoras
(ABB, Rockwell Automation, Siemens ou Schneider) achegando o seu
apoio para asegurar o meirande número de éxitos nesta nova edición
dunhas xuntanzas, coñecidas como as JAI, dirixidas a xuntar futuros
traballadores da enxeñaría e a robótica e compañías e centros de
I+D con capacidade para contratalos. As xornadas, que van pola súa
quinta edición celébranse entre o 12 e o 16 de novembro (agás o
14, para o que está convocada unha folga xeral) no Centro Social
Novacaixagalicia.
Arestora, a organización segue a
pechar máis apoios, o último o da Fundación Novacaixagalicia, que
porá a disposición dos asistentes as maiores facilidades para
acceder ao seu programa
de bolsas de iniciación laboral. Lembrar que nestes
encontros, amais de achegar un acubillo común para pór en contacto
ao alumnado coa empresas da automática, trátase de favorecer a
interacción, a inserción laboral e o coñecemento das necesidades
destes eidos da industria. “Robótica e automática teñen cada
vez máis peso nas plantas industriais e é preciso que formar
futuros profesionais preparados para un mercado en constante
evolución e coñecedores das necesidades e tendencias do sector;
para isto, o contacto directo coas empresas durante
estes catro días é unha achega dun enorme valor”, informa en
detalle a Universidade de Vigo.
Para os que non poidan asistir, as
JAI2012 serán retransmitidas en directo a través de UvigoTv.
Colaboradores de primeira liña
Nesta quinta edición das JAI colaboran
13 empresas do eido da automática (ABB, Beckhoff, Harting, Imatia,
Kuka, Mdt Software, Omron, Phoenix Contact, Rockwell Automation,
Schneider Electric, Siemens, Weg e Wonderware), ás que cómpre sumar
outras entidades participantes como Base2, DNET, Logitek, Macraut,
Solidq, así como asociacións nacionais como o Comité Español da
Automática, a Sección Española da International Society of
Automation e internacionais como OPC Europe e PLCopen.
Ignacio Armesto destaca tamén a
participación de catro egresados das antigas escolas de enxeñería
industrial, como José Manuel Pazo, socio consultor de Enermed e
general advisor de Eurus Energy; Óscar Fernández, responsable de
automatismos e manutención dos centros de produción de PSA Peugeot
Citroën en Vigo e Mangualde; Alfonso García, catedrático da
Universidade de Málaga e Antonio Casal, director do centro de
operacións de ENCE Pontevedra.