Lugo Transforma mobilizará 12 millóns e atraerá empresas de tecnoloxía, loxística e aeronáutica
mércores, 30 de decembro do 2020
O
Concello de Lugo vai mobilizar en menos de 5 anos un total de 12
millóns de euros no impulso económico, na diversificación
produtiva, na xeración de emprego e na atracción de empresas.
Farao a través da Estratexia Lugo Transforma, lanzada polo Goberno
lucense para, tamén, consolidar pemes que “xeren un alto impacto
social e ambiental no municipio nun prazo menor de cinco anos”.
Trátase, dixo este martes 29 de decembro a alcaldesa Lara Méndez,
dunha “ferramenta propia moi poderosa na que se vai investir a
maior contía da historia da cidade”.
Os
proxectos nos que se traballarán deberán estar relacionados coas
enerxías limpas, as tecnoloxía, a biotecnoloxía, a farmacia, os
servizos avanzados á industria, os biocombustíbeis, a produción
agroalimentaria sustentábel, a loxística intelixente e o sector
espacial e aeronáutico, entre outros eidos innovadores de
actividade.
A
alcaldesa sinalou que “todos os proxectos deberán ser considerados
innovadores”, é dicir, “que poidan demostrar que promoverán
produtos, servizos ou procesos novos ou mellorados de xeito
substancial, e que os seus custos de investigación e desenvolvemento
representen un mínimo do 10% do total dos seus gastos de
explotación”.
Lara
Méndez destacou que o fondo emprendedor estará aberto á entrada
de participación tanto pública como privada, ben en todo o fondo ou
ben en calidade de co-investidores en proxectos concretos.