Luciano Vidán, socio de honra 2018 da Asociación de Enxeñeiros de Telecomunicación de Galicia
luns, 28 de maio do 2018
- Luciano Vidán e Julio Sánchez Agrelo, presidente da AETG, na formalización dun acordo recente
Este
1 de xuño, no marco da Noite Galega das Telecomunicacións, o
presidente do Colexio Oficial de Médicos da Coruña, Luciano
Vidán, recollerá o o galardón de Premio Socio de Honra 2018 que
que entrega a Asociación de Enxeñeiros de Telecomunicación de
Galicia (AETG). A 23 edición da Noite, na que haberá outros
recoñecementos a entidades, empresas e profesionais destacados no
progreso tecnolóxico da nosa terra (os
Premios Galicia das Telecomunicacións e da Sociedade da Información
2018, dos que dimos conta os días pasados dende Código Cero),
terá este ano o seguinte fío temático principal: a información a
gran escala, o chamado Big Data.
Segundo
informan o Colexio Oficial e a Asociación de Enxeñeiros de
Telecomunicación de Galicia, COETG-AETG, a distinción a Vidán vén
dada “polo pulo outorgado á entidade que dirixe en relación ao
desenvolvemento de novas tecnoloxías que permiten mellorar e
optimizar o traballo no eido sanitario”. Neste sentido, o Colexio
de Médicos da Coruña, segundo constata o seu representante, aposta
polo favorecemento do uso das novas Tecnoloxías da Información e da
Comunicación (TIC) na profesión médica co obxecto de que o seu
emprego redunde “nunha mellor praxe e nunha mellor atención
sanitaria aos cidadáns”. Sen ir máis lonxe, o
Colexio uniu forzas os días pasados co COETG-AETG para
impulsar unha aplicación móbil médica que
axude aos facultativos en labores administrativos, a estaren máis e
mellor informados e formados e, tamén, a
contaren con meirandes
posibilidades de exercer en contornas seguras (grazas ao botón de
agresións que inclúe a ferramenta móbil).
Como
dixemos, homenaxeado recollerá o galardón o vindeiro 1 de xuño en
Vigo, no marco da celebración da vixésimo terceira edición da
Noite Galega das Telecomunicacións 2018, á que está prevista a
asistencia de multitude de empresas TIC e representantes das
entidades relacionadas co sector.