Lourdes Araujo abre este venres o seminario de Intelixencia Artificial da UNED en Ourense

Este venres 5 de marzo arrinca a segunda fase do Seminario de IA da UNED que se emitirá cada venres, ás 12.00 horas, ao abeiro do ciclo Os Venres con IA, do Centro de Intelixencia Artificial de Ourense. O primeiro relatorio vén da man da catedrática Lourdes Araujo, que disertará sobre Extracción de información no dominio médico. Nesta sesión, a súa autora vai percorrer algunhas das moitas aplicacións que teñen as técnicas de Procesamento de Linguaxe Natural para mellorar os procesos de obtención de información no dominio médico.
Estas metodoloxías, explican fontes de UNED Ourense, van desde a recompilación e cruzamento de información de distintas fontes á axuda ao diagnóstico, pasando pola mellora da comunicación a distintos niveis. Amais, o relatorio servirá para mostrar as técnicas que están a utilizarse nestas aplicacións e cales son as vantaxes e desvantaxes dos distintos enfoques.
Lourdes Araujo é catedrática de universidade e directora do Departamento de Linguaxes e Sistemas Informáticos da UNED. Colaborou e colabora con distintos organismos de avaliación como ANECA ou a Axencia Estatal de investigación. Forma parte do grupo de Investigación da UNED de Procesamento de Linguaxe Natural e Recuperación de Información. Conta con máis de 100
publicacións en distintos temas da área, incluíndo recuperación de información, detección de correo lixo en páxinas web ou redes sociais, e especialmente en aplicacións ao dominio médico.