LinkedIn desactiva os contrasinais filtrados de máis de 6 millóns das súas contas
venres, 8 de xuño do 2012
Esta semana o roubo de contrasinais de servizos en liña está
de máxima actualidade, e confirmouse que conseguiron
facerse con contrasinais dun grupo reducido de usuarios de eHarmony, Last.fm recomenda mudar de
contrasinal despois dunha filtración e dende LinkedIn recoñecen
que os informes que apuntan ao roubo de 6.458.020 millóns de contrasinais dos
seus usuarios é certo. Pero neste último caso LinkedIn non está a limitarse
a informar, senón que para evitar problemas maiores, veñen de anular todos os
contrasinais que do seu servizo que se filtraron á Rede, de xeito que os
usuarios deberán pór un contrasinal novo, para o que recibirán instrucións por
correo electrónico en mensaxes nas que non será preciso premer en ningunha
ligazón (para evitar que sexan replicadas en prácticas de phishing).
Por fortuna, estas noticias contribúen a que se tomen novas medidas de
seguridade, aÃnda que, como en anteriores ocasións, recoméndase seguir certas
normas á hora de elixir contrasinais, pois cómpre lembrar que os datos que se
filtran están encriptados, de xeito que normalmente lánzanse ataques de
dicionario contra tal información, de xeito que os usuarios que empregan
palabras, nomes ou números son moi susceptibles de ter as súas contas
comprometidas no futuro.