Libros electrónicos máis caros que impresos en papel?
martes, 5 de outubro do 2010
Cantas veces non temos mercado un
peza de roupa que co paso duns meses atopamos na tenda a metade de prezo e
incluso tres ou catro veces máis barata que cando a adquirimos?, e cantos non
temos mercado algún teléfono móbil ou dispositivo electrónico a prezo de ouro
que en menos de dúas semanas xa tiña un sucesor moito máis atractivo e con
mellor relación calidade-prezo facendo que nos quedara cara de parvos de
maneira permanente?
Pois ben, algo semellante está a
ocorrer agora mesmo cos libros electrónicos, que custan máis que os seus
homólogos impresos en papel, malia que estes últimos conlevan moitos máis
custes de fabricación e distribución.
Aos consumidores deste tipo de
tecnoloxía quédalles cara de debuxo animado ao ver que, por poñer un exemplo, A caída dos xigantes, a última novela de
Ken Follet, custa en Amazon.com 19,39 dólares na súa versión impresa mentres
que o mesmo libro en versión electrónica para Kindle ten un prezo de 19,99
dólares.
Ante esta realidade, tal
e como afirman en Portaltic.es, “é
imposible preguntarse como pode ser máis cara a versión dixital cando permite
aforrar cuantiosos custes”.
A explicación, segundo o mesmo
medio, é que “as editoriais teñen
liberdade para fixar os prezos na tenda en liña, mentres que para a versión
impresa segue a ser Amazon o encargado de fixar a contía pola que se serán
vendidos”.
Xa que logo, os consumidores
afirman sentirse enganados ao ver que, segundo recolle o devandito medio en
liña, están “acostumados” a pagar un
máximo de 9,99 dólares por cada libro para Kindle, e non os preto de 20 dólares
que lles esixen últimamente por algún exemplar electrónico.
Agora ben, como ben asegura o autor
da nova, malia que moitos consumidores se queixaron destes prezos, “tamén é certo que a moitos outros non
pareceu importarlles, xa que, por exemplo, a novela de Follet para Kindle leva
oito días nos primeiros postos da lista dos máis vendidos”.