Librebit, certificada por LibreOffice como firma experta en migración ofimática
mércores, 2 de setembro do 2015
The
Document Foundation, responsábel do impulso e desenvolvemento de
LibreOffice (suite ofimática aberta independente) certificou
á firma galega Librebit como empresa especializada na realización
de migracións profesionais ao devandito paquete libre de ferramentas
ofimáticas. Esta acreditación, informa a empresa con sede en
Vigo, confire a Librebit o acceso a recursos da fundación para
executar proxectos de adaptación dende Microsoft Office a
LibreOffice, con soporte dos desenvolvedores, equipo de mantemento de
calidade (QA, Quality Assurance) ou formación.
Librebit engade que este
“fito foi posíbel despois de ter pasado por un rigoroso proceso de
certificación con detalle de proxectos anteriores xa desenvolvidos
ou en curso e máis entrevistas persoais”.
A firma galega tamén
recorda que arestora está apoiando e dando soporte
técnico á Xunta de Galicia no proceso de migración á devandita
plataforma ofimática libre en máis de 16.000 equipos do ámbito
dos empregados públicos. Este complexo proxecto, engade Librebit,
realízase a través de AGASOL, a Asociación de Empresas Galegas de
Software Libre e foi posto en marcha en 2013 coa elaboración dunha
folla de ruta na que se especificaron as liñas a seguir nos
traballos de adaptación ao software libre (baseadas no protocolo
de migración da fundación para despregues a gran escala).
