Libra incorpora a xeración de informes mediante alertas

Libra, a día de hoxe unha das principais plataformas de xestión do mundo (tanto por presenza como por evolución e incorporación de funcionalidades), vén de estrear nova funcionalidade. Segundo nos contan dende Edisa, a firma galega responsábel do desenvolvemento e distribución da plataforma, esta incorporou a función de achega de informes (reports) mediante alertas a través do seu módulo Galileo. Estas alertas-informes fornécense en formato PDF para o seu envío como arquivos adxuntos ou ben para a súa impresión.
Desta maneira, explica Edisa, podemos mesmo programar o período de tempo preciso (semanalmente, diariamente, mensualmente) para que determinado informe de Libra que queremos xerar sexa enviado aos destinatarios que desexemos. As principais necesidades que esta mellora na plataforma resolve son, entre outras, o envío periódico dos albarás ou pedidos a clientes ou tamén o subministro de informes aos propios membros da empresa. A nova funcionalidade abrangue tamén a posibilidade de termos configuradas as impresoras no servidor de informes-alertas e permitir a saída destas por unha determinada impresora. A mellora está dispoñíbel tanto en instalacións Forms 11 como en instalacións cliente/servidor, onde é preciso usar o servizo de GalileoGAL_COMCOMANDOS, ao que se lle aplicaron cambios para soportar a nova funcionalidade.