Liberado o código do software DESOURB, destinado a optimizar a xestión territorial sostíbel
venres, 6 de marzo do 2015
A AMTEGA e o IET (Instituto de Estudos do Territorio) veñen de
liberar o código do proxecto
DESOURB (Desenvolvemento Sostible Urbano), unha ferramenta
informática que ten como obxectivo permitir a xestión sustentábel
dun territorio, amais de tarefas de análise, diagnóstico e
seguimento, todo baixo o mesmo nexo común da sostibilidade. En
virtude da dita liberación, o
software fica accesíbel para a comunidade internauta no Repositorio
de Software Libre da Xunta, onde se pode atopar o código fonte
completo da aplicación e súa documentación. A idea é contribuír
ás segundas e terceiras vidas da ferramenta, e tamén ao seu
enriquecemento con novas achegas e experiencias de adaptación a
contornas variadas.
Segundo fan saber
AMTEGA e o IET, ter ceibado o código de DESOURB “supón a posta a
disposición dos cidadáns dunha plataforma moi potente para a
xestión do territorio, que pode ser empregada polos concellos,
mancomunidades ou calquera administración ou entidade de xeito
gratuíto”.
Como dixemos, o
proxecto DESOURB foi posto en marcha coa finalidade de definir un
modelo innovador de planificación e xestión territorial baseado en
indicadores. A iniciativa, desenvolvida polo Instituto de Estudos do
Territorio da Xunta de Galicia, xunto co Eixo Atlántico do Noroeste
peninsular a través de Eixoecologia (Axencia de Ecoloxía Urbana do
Eixo Atlántico do Noroeste Peninsular), está financiada con fondos
europeos do Programa de Cooperación Transfronteiriza España-Portugal
(POCTEP). Ao abeiro do proxecto deuse forma á devandita ferramenta,
presentada como unha plataforma informática en web. Entre outras
cousas, posibilita a captura e achega de datos en soporte
alfanumérico ou xeográfico, a creación de diagnósticos ou o
seguimento das actividades. Tamén permite o cálculo automático de
indicadores, “dende os que comprenden cálculos máis sinxelos,
como os máis complexos que requiren operacións con datos
xeográficos”, sinala AMTEGA.