Lara Méndez renova e habilita novas antenas Wi-Fi para achegar acceso a Internet de balde á cidadanía
xoves, 3 de novembro do 2022
- A alcaldesa Lara Méndez nunha imaxe de arquivo
O
Concello de Lugo anunciou importantes mellores en conectividade ao
servizo da cidadanía. Segundo fixo saber a
alcaldesa Lara Méndez, estanse a instalar novas antenas Wi-Fi e
renovándose as xa existentes en prazas e edificios municipais “para
facilitar o acceso de balde a Internet”. Nos vindeiros días
finalizará a instalación de novos equipamentos en dez prazas da
cidade con moita afluencia de xente a diario, xente nova e tamén
persoas maiores.
Así
o informou a rexedora local, quen subliñou que “vimos de aprobar a
licitación do proceso, por un importe de 130.792,93 euros, de
maneira que avanzamos na procura dunha cidade máis moderna e
conectada, proporcionando acceso sen fíos e gratuíto a internet nos
principais espazos da vida pública”.
Esta
renovación farase con cargo aos fondos do programa de axudas a
municipios do Ministerio de Política Territorial para a
Transformación Dixital e Modernización das Entidades Locais, no
marco do Plan de Recuperación, Transformación e Resiliencia dos
fondos europeos Next Generation. “Ademais da substitución de
antigas antenas, o contrato licitado contempla a instalación de
novos puntos de acceso á rede no novo Centro Social de Lamas de
Prado; o edificio Paco Marín; o edificio Impulso Verde; o CEI-Nodus;
e a Piscina das Pedreiras”, explicou Lara Méndez.
Por
outra banda, a alcaldesa informou que “a vindeira semana está
previsto que finalice, así mesmo, a instalación das antenas Wi-Fi
do programa Wifi4EU”. Este programa europeo, para o que Lugo
resultou seleccionado, ofrece un financiamento de 15.000 euros aos
municipios para habilitar puntos de acceso sen fíos á Rede, co
obxectivo de promover a conectividade Wi-Fi para os cidadáns e
transeúntes en espazos públicos de toda Europa.
A
través desta convocatoria, o Executivo municipal instalou antenas en
dez localizacións: praza da Milagrosa; praza Agro do Rolo; praza de
Augas Férreas; praza Maior; Casa da Xuventude; praza do Castiñeiro;
praza Viana do Castelo; praza do Campo Castelo; Centro de Servizos
Municipais; e na praza Horta do Seminario. O orzamento total foi de
36.193,51 euros dos cales 15.000€ están financiados pola Comisión
Europea.
Conexión
Wi-Fi gratuíta nos centros municipais
Na
actualidade o Concello dispón de puntos Wi-Fi instalados en
numerosas dependencias municipais entre as que se atopan as
seguintes: Centro de Servizos Municipais; Casa do Concello; Policía
Local; Parque de Bombeiros; Pazo Municipal dos Deportes; Centro de
Convivencia da Milagrosa; Centro de Convivencia de Fingoi; Local
Social Díaz Castro; Centro de Convivencia Maruja Mallo; Centro de
Convivencia Sagrado Corazón; Centro de Convivencia Uxío Novoneyra;
Auditorio Municipal Gustavo Freire; Centro Cultural Vello Cárcere;
Casa do Deporte; Museo Interactivo da Historia de Lugo (MIHL);
Mercado Municipal Quiroga Ballesteros; Casa da Xuventude; Nave de
asociacións; Biblioteca Municipal Isidro Novo; Piscina Municipal As
Pedreiras; Complexo deportivo As Pedreiras; Casa das Asociacións
María Mariño.