Láncara acolle o día 23 unha xuntanza para impulsar o desenvolvemento de maquinaria agrícola libre
mércores, 14 de outubro do 2015
Os seareiros da enxeñaría, a robótica e a
intelixencia artificial sen cancelas, operada a través de programas
abertos, teñen unha cita ineludíbel para o 23 deste mes no concello
lugués de Láncara. Trátase, de maneira moi acaida tratándose dun
concello onde as actividades agrarias teñen un peso especialmente
relevante, dunha xuntanza dirixida a impulsar unha comunidade
desenvolvedora de maquinaria agrícola en código aberto. O lema
elixido tamén vén moi a conto tendo en conta a natureza argalleira
(no bo sentido) da xuntanza: Eu
Amo Fedellar. O encontro
está aberto á participación de todo tipo de xente co gallo de ir
artellando e dinamizando a creación dunha comunidade open
source. Detrás desta
cita atópase a Rede ReVOLTA
(composta por sete grupos de investigación das universidades
galegas).
Amais da Rede ReVOLTA a xornada vén da man do
colectivo de creación contemporánea Montenoso,
a ONG Enxeñería
sen Fronteiras, o colectivo Makers
de Lugo, a Asociación
Galega de Amigos de Maquinaría Agrícola Clásica
e o Colexio
Alcalde Xosé Pichel de Coristanco. O eu
obxectivo, a maiores, é dar forma a unha comunidade de
desenvolvedoras e desenvolvedores de maquinaria agrícola con
software libre.
Segundo apuntan estas asociacións, o movemento
arredor do código aberto (movemento Open
Source) ten aberto “un amplo abano de posibilidades de
desenvolvemento de programas, aparellos e tecnoloxías diversas por
parte de colectivos diversos, tanto nos ámbitos do hardware libre e
o software libre como tamén no ámbito da maquinaría agrícola en
aberto”. Se por algo se caracterizan estas comunidades é por
traballar en equipo e fomentar a apertura do código e a posibilidade
de remestura e uso por parte da cidadanía interesada, “facilitando
que todo aquel que teña inclinación por estas cuestións poida
fedellar e forzar no seu aparello e artellar por si mesmo a súa
propia maquinaria”, sinalan dende as ditas asociacións galegas,
que engaden que a proposta de Eu Amo Fedellar insírese (tamén e por
dereito propio) no movemento das economías en código aberto. Polo
tanto, din, a proposta parte de dúas fontes principais. A primeira é
a capacidade propia das galegas e galegas que historicamente veñen
acreditando un amplo potencial de autosuficiencia. A segunda son os
alicerces do proxecto Open
Source Ecology, unha comunidade que leva
traballando tempo no desenvolvemento de maquinaría agrícola en
código aberto.
Volvendo á cita do 23 (fixada no Museo Integrado de
Maquinaría Agrícola Clásica situado en Trasliste, Láncara, Lugo),
servirá polo tanto para pensar o que facer con todas as habilidades
e coñecementos que achega cada integrante e cada experiencia
paralela previa. Será, en palabras dos organizadores, “unha mostra
de diferentes accións relacionadas coa maquinaría agrícola en
código aberto, a evolución da innovación tecnolóxica ou a
necesidade de impulsar a robótica no medio rural”. O encontro é
aberto, pero é preciso inscribirse mandando un correo a
rede.revolta@usc.es antes do mércores 21 de outubro.
O programa do encontro é o seguinte:
11:00-11:10 Presentación
xornada
11:10-11:40 A innovación
tecnolóxica ao longo da historia_Lourenzo Fernández Prieto
[Catedrático de Historia Contemporánea da USC]
11:40-12:10 Non
Intente facer isto na súa casa: Experiencia persoal no deseño e
manufactura dun produto calquera_Pablo Blanco [Montenoso]
12:10-12:40 As
tecnoloxías non son neutras_[Enxeñería Sen Fronteiras]
12:40-13:00 Café-debate
13:00-13:30 Por unha
robótica Open Source no rural_Tucho Mendez [CPI Alcalde Xose Pichel
Coristanco]
13:30-14:00 Ou de como
amañar un tractor con arduino_Jesús Toural [Makers Lugo]
14:00-14:30 Maquinaría
agrícola clásica, unha actividade innovadora_Marcos Vázquez
[Asociación Galega de Amigos de Maquinaría Agrícola Clásica]
14:30-15:00 Conclusións
do Encontro
A localización do Museo
está na parroquia de Trasliste, concretamente no lugar A Eirexe,
número 1.
Palabra clave do evento:
#euamofedellar.
Máis información do
evento: revolta.usc.es/gl/nova/euamofedellar/