Lacoste lanza tenda en liña para o mercado estatal
martes, 19 de xaneiro do 2016
Lacoste vén de estrear
tenda en liña para o mercado estatal. O establecemento en liña da
marca francesa (lacoste.es)
foi desenvolvido pola empresa catalá Trilogi, firma de solucións
para comercio electrónico con sede de seu en Igualada (Barcelona). A
tenda, operativa dende finais de 2015, vai comercializar de xeito
integral as coleccións de Lacoste (home, muller, nenos), incluíndo
produtos téxtiles, complementos e zapatos. Para dar corpo á eShop
da marca francesa, presente no mercado estatal dende 1962, asumiuse o
reto de achegar “unha experiencia de compra omnicanle”.
Isto significa, para
facernos unha idea, que se queremos mercar algo na dita tenda teremos
a opción de recoller os produtos comprados en calquera dos puntos de
venda físicos da compañía, así como tamén tramitar neles as
posíbeis devolucións. A tenda online, que pode visualizarse
correctamente desde calquera dispositivo móbil, incorpora unha nova
tecnoloxía creada por Trilogi que permitirá, en palabras da
compañía, “maximizar o rendemento da plataforma e lograr un maior
cociente de conversión”.