LV De Luns a Venres cumpre cinco anos de vida con 60.000 visitas mensuais á súa web
xoves, 22 de decembro do 2011
Nun panorama cada vez máis cru para os medios,
hai quen resiste, e ademais achegando información en galego, cousa que nos
tempos que corren semella dobremente complexa. Falamos de LV De Luns a Venres, que cumpriu este 21 de decembro cinco anos de
vida na rúa (e nunca mellor dito, porque sae ao paso dos viandantes), achegándonos
unha publicación de balde e en galego, cousa moi de agradecer. O xornal
conmemorou este importante feito con varias cousas relacionadas coa Rede.
Por unha banda, permitíndolles aos lectores de
todo o mundo a descarga do
número especial do quinto aniversario de LV e, pola outra, achegándolles un
redobrado esforzo por tomarlle o pulso á actualidade a través da súa páxina web, fusionada coa plataforma dixital
Galiciaé.
Por certo que logo destes cinco
anos de vida do xornal, LV foi quen
de conseguir as seguintes cifras recentes: 60.000 visitas mensuais e unhas
5.000 a través das dúas principais redes sociais, Facebook
e Twitter.
Segundo se conta en El Progreso, de
Galiciaé, “os datos de OJD -–PGD no caso
da prensa gratuíta–- sitúan o gratuíto galego como o terceiro en difusión de
Galicia -–32.906 exemplares de media–- e entre os trinta primeiros de España”.
A estes lectores, engade El Progreso, “súmanse
ademais 5.400 subscritores a través de internet, que descargan a diario o
xornal en PDF en Galicia e noutros puntos de España e do mundo”.