Kaspersky Lab lanza unha aplicación para axudar aos usuarios de Facebook a ter só “amigos de verdade”
venres, 23 de maio do 2014
A compañía de
seguridade informática Kaspersky Lab vén de lanzar unha ferramenta
para axudarnos a ter conta directa da nosa actividade e a dos nosos
contactos na rede social Facebook. Trátase, máis polo miúdo, da
aplicación FriendoOrFoe, que como o seu propio nome indica,
semella unha ferramenta directamente encamiñada a dicirnos quen é
amigo en Facebook e quen simplemente está aí, nos nosos contactos,
para ocupar sitio, dar a vara, sumar nomes ou algo peor.
A ferramenta, que é de
balde, amosa que contactos “son os que máis recomendan e comentan
as nosas entradas”, amais de informar de posíbeis ameazas e
asesorar para mantermos o perfil e datos persoais seguros.
Esta ferramenta, informa
a compañía, diríxese tamén a dar servizo a aqueles usuarios
interesados en analizar a súa actividade en Facebook a través de
estatísticas de seguimento: FriendOrFoe amosa en detalle cantos
vídeos e fotografías publica o internauta que ten instalada a app
e o número de gústame recibidos, “entre outros exemplos de
estatísticas pensadas para os seareiros máis acérrimos da rede
social”.
Kaspersky Lab lanzou a
ferramenta en español, inglés, ruso, alemán, francés, italiano,
portugués, árabe e xaponés. A súa idea, consciente de que a
maioría dos ataques de suplantación de identidades (phishing)
en redes sociais prodúcense en Facebook, era pór un extra de
seguridade na comunidade 2.0. Segundo informa a compañía, “a rede
social máis grande do mundo é un reclamo para os criminais en liña
que están á caza dos datos persoais e de acceso dos usuarios”.