José María Pousada, director do CUD, será galardoado na XX Noite Galega das Telecomunicacións
luns, 14 de setembro do 2015
Un dos premiados na
vindeira edición da Noite Galega das Telecomunicacións, a
convocatoria número XX, será
o enxeñeiro de Telecomunicación e director do Centro Universitario
da Defensa (CUD), Jose María Pousada. O galardón vén da man do
Colexio Oficial e Asociación de Enxeñeiros de Telecomunicación de
Galicia, que quixo recoñecer a contribución de Pousada á difusión
das novas tecnoloxías. A Noite celebrarase o 25 de setembro e nela
faráselle entrega oficial do Premio Enxeñeiro do Ano 2015. Pousada,
profesor da Universidade de Vigo, asumiu en 2099 o reto de pór en
marcha o centro universitario da Escola Naval Militar de Marín.
Previamente, entre 2003 e o 2009, foi director da Escola de Enxeñaría
en Telecomunicación.
O centro adscrito á
UVigo do que é responsábel a día de hoxe despediu o pasado mes de
xullo a súa primeira promoción de graduadas e graduados. Arestora,
o CUD conta con 36 profesores e profesoras, nas súas palabras “moi
involucrados no día a día do centro”, no que “todo o mundo está
satisfeito cos resultados”, recoñece Pousada, que sitúa na
potenciación do labor investigador o seu principal reto de futuro.
Neste intre, lembra, estase a rehabilitar o edificio que acubillará
os laboratorios para as investigacións do profesorado, que Pousada
agarda supoña un “cambio substancial” no labor investigador que
xa se vén facendo no CUD.
A andaina do enxeñeiro
galardoado coa Escola de Enxeñaría de Telecomunicación comezou en
1991. Ao seu xuízo, este centro está “estreitamente ligado á
explosión que viviu naquela década o sector das novas tecnoloxías
en Galicia, xa que as diferentes empresas e centros tecnolóxicos
nutríronse dunha escola que terá formado a preto de 3.000
enxeñeiros e enxeñeiras”. Pousada desenvolveu neste emprazamento
o seu labor investigador, vinculado estreitamente ao ámbito das TIC.
Segundo lembra a Universidade de Vigo, formou parte do Grupo de
Tecnoloxías da Información e traballou nel xunto con Javier
Castaño, Pedro Rodríguez e outros profesores e profesoras en
proxectos como o “sistema antimóbiles” que deseñaron en 1998. O
grupo tamén foi pioneiro propoñendo en 2002 unha pulseira
electrónica para o control dos maltratadores. Asemade, Pousada
contribuíu naquela etapa a mudar a face das lonxas galegas,
desenvolvendo o prototipo do mando que se emprega actualmente nas
poxas electrónicas.
Sobre a gala e o recoñecemento de que
vai ser obxecto por parte dos seus colegas de profesión, recoñece
que será un acto emotivo que lle vai permitir, entre outras cousas,
seguir en contacto cos seus compañeiros. Lembrar que na Noite tamén
serán premiados CO2 Smart Tech, Consultores Tecnológicos
Industriales de Galicia, Retegal, a asociación Puntogal, as aulas
interactivas para a estimulación cognitiva de Down Galicia e o
titulado Alberto Rico, gañador do premio Gradiant á mellor tese de
doutoramento.