Investigadores en TIC e formación unen forzas para habilitar unha rede galega de e-learning
martes, 23 de outubro do 2012
A Universidade de
Vigo ten estes días novidades no que a busca de novos xeitos de
formármonos, fóra dos xeitos tradicionais, se refire. Falamos
do desenvolvemento dunha rede galega de ensino a distancia,
e-learning,
apoiada nas máis innovadoras ferramentas tecnolóxicas e da
comunicación e cuxa posta en marcha
están a preparar a día de hoxe tecnólogos e pedagogos procedentes
de frontes diversas coordinados polo grupo de Enxeñaría de Sistemas
Telemáticos da Universidade de Vigo. TELGalicia, así se chama esta
rede, xorde co punto de mira posto directamente nas experiencias
positivas extraidas do Proxecto Abalar, iniciativa autonómica para
acadar a dixitalización das nosas aulas. A idea é reforzar o
traballo feito en Abalar en equipamento de recursos achegando ideas,
boas prácticas e ferramentas de calidade.
O traballo da nova rede de
investigación acaeralle ao contexto galego, adaptada de xeito
específico á nosa realidade educativa. Agrupa a profesionais e
grupos de I+D do Sistema Universitario Galego e máis do Centro de
Supercomputación de Galicia (CESGA) que traballan no desenvolvemento
das novas tecnoloxías aplicadas ao ensino e á aprendizaxe. “O
obxectivo”, sinalan estes grupos de I+D, “é contribuír a
mellorar o ensino e a aprendizaxe a través da innovación ou, dito
doutro xeito, aprender a sacarlle o máximo partido a múltiples
tecnoloxías que xa están presentes en moitas aulas e que van dende
os taboleiros dixitais, ata as tablets e smartphones”.
A rede celebrou este luns un primeiro
encontro de traballo no que participaron de forma presencial os
representantes dos seis grupos do SUG participantes -tres da
Universidade de Vigo e tres da Universidade de Santiago de
Compostela-, xunto con representantes do Grupo de e-learning do CESGA
que o fixo por videoconferencia.
Segundo fan saber, para pór en
marcha a iniciativa recibiron xa unha axuda de 120.000 euros con
cargo ao programa de consolidación de unidades de investigación
competitiva da Xunta na modalidade de redes de investigación.
