Investigadores de AtlantTIC e Gradiant obteñen importantes recoñecementos no congreso de ciberseguridade JNIC
xoves, 24 de xuño do 2021
As
Jornadas Nacionales de Investigación en Ciberseguridade (JNIC),
referentes estatais no ámbito da ciberseguridade, foron
especialmente propicias para a UVigo. No evento, organizado pola
Universidad de Castilla-La Mancha en colaboración co INCIBE
(Instituto Nacional de Ciberseguridade), os
investigadores do centro AtlantTIC da Universidade de Vigo acadaron
dous premios por dous artigos presentados.
Por
unha banda, o xurado outorgou o galardón ao mellor traballo xa
publicado ao artigo A review of Camera Attribution Forensic
Analyzer in the Encrypted Domain, asinado polos investigadores do
Grupo de Procesado de Sinal en Comunicacións Alberto Pedrouzo-Ulloa,
Miguel Masciopinto e Fernando Pérez-González en colaboración con
Juan R. Troncoso Pastoriza, da Escola Politécnica Federal de
Laussane (Suíza).
A
súa proposta foi seleccionada como a mellor entre 30 traballos
presentados nesta categoría. No artigo, os enxeñeiros describen un
sistema para resolver o problema de atribución de cámara, pero
preservando a privacidade da información en todo momento. Este
procesado seguro conséguese grazas a que os sinais involucrados
están cifrados durante todo o proceso de computación, “polo que a
solución proposta permite coñecer dende que cámara determinada se
sacou unha imaxe e, á súa vez, evita comprometer a seguridade da
información involucrada”, informou a UVigo, engadindo que “aínda
que o problema de atribución de cámara é xa coñecido, era a
primeira vez que se resolvía traballando con sinais cifrados”.
O
segundo galardón do congreso que vén para a UVigo é o premio ao
mellor artigo curto, polo traballo Homomorphic SVM Inference for
Fraud Detection, asinado por Adrián Vázquez-Saavedra, Gonzalo
Jiménez-Balsa e Jaime Loureiro-Acuña do Centro Tecnolóxico
Gradiant, e Manuel Fernández-Veiga e Alberto Pedrouzo-Ulloa de
AtlantTIC. Este artigo está baseado no traballo fin de mestrado de
Adrián Vázquez-Saavedra, coordinado polo profesor Manuel
Fernández-Veiga e defendido no marco do Mestrado Interuniversitario
en Ciberseguridade MUniCS. O traballo presenta un prototipo que
permite externalizar de forma segura un servizo de detección de
fraude empregando esquemas de criptografía homomórfica, que
permiten traballar directamente coa información en cifrado.