Investigadores da USC traballan nunha ferramenta que axuda a previr a ansiedade
mércores, 11 de outubro do 2023
Investigadores da Universidade
de Santiago traballan no desenvolvemento dunha aplicación móbil que
quere proporcionar recursos e estratexias aos usuarios/as para evitar
a ansiedade na poboación adulta. Trátase da ferramenta PrevANS.
Segundo explica a USC, funciona botando man dunha “calculadora de
risco” que, baseada nunha pequena enquisa, valora os factores de
risco de cada persoa (problemas de saúde física, dificultades
económicas ou insatisfacción co traballo) e indícalle a
probabilidade que ten de padecer problemas de ansiedade no próximo
ano.
A aplicación está a ser testada por un equipo no
que participa persoal investigador da USC xunto ao Instituto de
Investigación Biomédica de Málaga (IBIMA), da Universidade de
Málaga, Universidade Loyola de Andalucía e da Universidade de
Salamanca.
“A ansiedade é o problema psicolóxico máis
frecuente na poboación e calcúlase que afecta a aproximadamente
tres millóns de persoas en España. Ante esta situación e co
obxectivo de evitar que estas cifras continúen en aumento nace
PrevANS”, explican dende o equipo investigador no que participa
Carmela Martínez Vispo do Departamento de Psicoloxía Clínica e
Psicobioloxía da USC. O obxectivo último é avaliar a eficacia
dunha intervención psicolóxica en liña personalizada para a
prevención da ansiedade. “Trátase, en definitiva, de mellorar
a saúde mental e fortalecer o benestar de calquera persoa”,
afirman, engadindo que “neste momento estamos na fase de avaliar a
eficacia da intervención e para iso necesitamos participantes que
proben a aplicación para poder analizar posteriormente a súa
efectividade e se esta nova ferramenta realmente é capaz de evitar a
aparición de problemas de ansiedade”.
Para o devandito obxectivo, buscan 2.000 persoas
de España e Portugal que estean dispostas a instalarse a aplicación
no seu móbil, tablet ou computador. As persoas que desexen
incorporarse como voluntarios/as deben facelo a través da páxina
web do proxecto.
PrevANS é un proxecto financiado pola Axencia
Estatal de Investigación (AEI) e o Instituto de Saúde Carlos III
(ISCIII) do Ministerio de Ciencia e Innovación. Enmárcase dentro da
Rede de Investigación en Cronicidade, Atención Primaria e Promoción
da Saúde e está avalado polo Comité de Ética pertinente.