Intel felicita o aniversario de Stephen Hawking cunha peza de silicio de 300 mm personalizada
martes, 22 de xaneiro do 2013
Esta semana o
senlleiro científico británico Stephen
Hawking estivo de aniversario e a multinacional tecnolóxica Intel
non quixo deixar pasar a oportunidade de felicitalo de primeira
man. E fíxoo dun xeito que lle é propio: a través dunha oblea de
silicio de 300 mm, como as que decote se empregan para a produción
masiva dos chips da propia compañía. O agasallo en cuestión, todo
hai que dicilo, era algo máis ca unha simple oblea de raizame
mineral: amosaba no seu seo a mensaxe Feliz
aniversario Stephen
Hawking, inscrito con tecnoloxía de
32nm centos de veces (co fin, se cadra, de descartar calquera
posibilidade de esquecemento por parte do científico, cousa por
outra banda improbábel).
O galano foille
entregado ao homenaxeado nunha cerimonia celebrada no Centro para a
Cosmoloxía Teórica de Cambridge, do que Hawking é director de
investigación e máis fundador. Para dar forma estas mensaxes,
informa Intel, empregáronse as liñas de cobre a nanoescala, das que
se adoitan a usar nos chips de baixa potencia e alto rendemento, como
os que van incluídos
nos smartphones
máis recentes con tecnoloxía de Intel. Cada letra amosaba unha
amplitude de dez nicróns, o que máis ou menos é dez veces menor cá
anchura dun cabelo humano.
O obxectivo de
Intel, con este agasallo, foi o de recoñecer as “contribucións
científicas revolucionarias do profesor Hawking e a súa notábel
teimosía
como inspiración para todos”. Lembrar
que o devandito centro de I+D que o científico británico dirixe
conta no seu seo cun novo supercomputador con tecnoloxía de Intel, o
Cosmos Mk IX, que se dirixe a tentar resolver algúns dos desafíos
matemáticos máis complexos aos que se enfronta a comunidade de
investigación cosmolóxica. Empregarase entre outras cousas para
afondar nas orixes do Universo.