Intel e Sky permitirán ver escenas críticas de fútbol dende tódolos ángulos
xoves, 4 de xuño do 2015
Intel vén de xuntar
forzas con Replay e Sky para, sinalan, cambiar
para sempre o noso xeito de ver o fútbol. E como vai ser isto?
Pois para comezar, achegarán en Europa como primicia a posibilidade
de asistirmos ás escenas máis críticas e cruciais dende todos os
ángulos posíbeis. Como conclusión, remataron os debates que se
xeran entre os seareiros dos dous equipos contrincantes arredor de
cousas como un fóra de xogo que non fica claro ou un hipotético
penalti. Así o conta Sky, provedor de televisión de pago para
Alemaña e Austria, que vén de pór en marcha este proxecto piloto
en Europa onde as novas tecnoloxías “inmersivas” permitirán
desvelar o misterio que rodea calquera acción dos xogadores onde as
cámaras tradicionais non dean chegado.
Esta nova técnica é
posíbel grazas a FreeD, unha tecnoloxía de Replay, e á potencia de
computación masiva proporcionada por Intel. FreeD, sinalan as
empresas responsábeis do proxecto piloto, é quen de crear un fluxo
de imaxes en 360 graos, ao “estilo Matrix”, que permite aos
produtores de Sky amosar a acción “desde todos os ángulos
imaxinábeis”, o que fornecerá tomas panorámicas onde a cámara
“practicamente voa sobre unha escena ao mesmo tempo que a grava
dende tódolos ángulos”. Isto lógrase mediante un conxunto de 32
cámaras 5K que están instaladas en todo o estadio e que filman o
xogo na súa totalidade.
Toda esta cantidade de
datos simultáneos de vídeo transfírense a unha serie de
computadores con Intel Xeon E5 e Intel Core ? i7, que despois
producen unha posición de cámara virtual a partir deste conxunto
masivo de información. Ao fío da importancia de contar cos
procesadores de Intel, a firma Sky fai saber que “a tecnoloxía
FreeD non sería posíbel sen a potencia de computación masiva que
Intel pon en xogo”. E engade: “Cada segundo, as 32 cámaras de
todo o terreo de xogo xeran até 1 terabyte de datos de vídeo que
precisa ser procesado en cuestión de segundos co obxecto de dar a
Sky a capacidade de elaborar con eles a súa secuencia de vídeo”.