Innovación pon en marcha a Rede de dinamizadores da Sociedade da Información
martes, 16 de xaneiro do 2007
A Consellería de
Innovación non quere estar soa no labor de convencernos de que as novas redes
do coñecemento posibilitan un enriquecemento da nosa cultura e unha meirande
capacidade competitiva do eido empresarial. Neste senso, considera fundamental
a entrada en xogo dun equipo de persoas especificamente formadas no tecnolóxico
e que cheguen ó máis recóndito de Galiza para informar das vantaxes das novas
canles dixitais. Este é precisamente o cometido da Rede de
dinamizadores da Sociedade de Información, proxecto da Consellería que foi
posto en marcha este martes 16 de xaneiro de xeito oficial e que xa botou a
camiñar nunha fase previa de desenvolvemento e preparación teórica a principios
de 2006.
A iniciativa, que forma parte do PEGSI
2007-2010 aprobado polo Consello da Xunta o pasado mércores 10 de xaneiro,
consiste en liñas xerais nun convenio da colaboración entre Innovación e 100
entidades para a formación práctica dos bolseiros dinamizadores, futuros
encargados de acurta-la distancia que afasta a moitos galegos e galegas da
Internet.
A índole destas
entidades é ben diversa: concellos, asociacións culturais e de empresarios, e
centros de desenvolvemento comarcal que están a poñer a disposición da
Consellería recursos para a devandita aprendizaxe práctica (a teórica xa se
levou a cabo).
Asemade, estas 100 entidades “comprométense
a contratar ós bolseiros e bolseiras que tiveran ó seu cargo en caso de que a
práctica fose satisfactoria”, informa Innovación. O proxecto da Rede de
dinamizadores ten o seu xermolo “na
existencia dunha importante dotación de aulas con infraestrutura suficiente
para a realización de actividades relacionadas coa Sociedade da Información e
que en boa parte dos casos están sendo infrautilizadas por non existiren
profesionais dedicados a dinamizar o seu uso”, sinala o departamento da
Xunta.
É así, polo tanto, como xorde a iniciativa de dinamizadores, orientada a
favorecer o acceso dos cidadáns á Sociedade do Coñecemento, a darlle un novo
pulo ás empresas a través da Rede e a informar dos empregos da Internet nos
espazos rurais e máis afastados.